01/12/10

"A Queda"


Mi mai fui to la bida porsora purmaira i ten 3 primas an Bila Chana– tenie, que dues yá se murrírun – que tamien fúrun siempre porsoras. Pulas quatro dá arrimado a más de 120 anhos de scuola; yá bistes quanta manica nun fui perciso zangaranhir para ber de fazer ls AA bien redundicos, quanta munquita nun serie perciso fungar… i cuontas! Yá bistes?, 120 anhos de cuontas!... I ye que apuis las de Bila Chana nun deixában cair nada ne l chano, el era cada passaige… i cun un jeito para las cuntar, ora ye berdade, ah Almendra?!... era (i inda ye) un regalo, i ua suorte, poder oubir las que le passában, scuitai esta, cuntada cun menos jeito:

L títalo de la liçon era “A Queda” i la porsora habie-la mandado studar an casa. Lhougo d’antrada, para ls spurmentar, bai i procura-le:
- Então estudastes a lição?
-Studemos, si senhora, senhora porsora.
- E sabeis o que é uma queda?
Ye un tombo, ye ua chimpa, ye un bolco, ua caída, alberotában-se ls garoticos cun ganas de amostrar serbiço i la liçon na punta de la lhéngua.
- Pois…, mas e de que queda se trata nesta lição? Diz lá tu, António.
- Era Adan i Eba que stában ne l paraíso i querien quemer ua maçana…
- Sim. Continua tu, Francisco, a ver se percebeste bem.
Miu Chico, pastor spurmentado, a quien l ganado i ls mandiletes de casa nun deixában tiempo para cismas filozofico-lhiterárias, mas que nun querie dar parte de fraco, squermentado que staba de yá haber sido dues ó trés bezes acaçado sien studar la liçon, purmeiro inda tanteou:
- Era Adan i Eba que stában ne l paraíso i querien quemer ua maçana…
- Sim… mas e “a queda”, o título, o que vem a ser isso “da queda”
Tubo que se botar a búltio.
- Oh, pus isso fui por bias de querer quemer la maçana. Adan chubiu-se na maçaneira, cumo quiera que se le scochou un galho… i dou ua caída.

7 comentários:

ACangueiro disse...

gaçpiei l retrato,(çapateiro fui) scuitei, mares datrás nabegados, nabeguei-los rebuotosos, (you sou marinero...yá fui), suonhos que sonhei, catrapuç - "a queda" - la bara, nó, la maçana, de Adan... mas foi Eba...tiempo, bal de lençoles...,só bós, Tortulhas, un tiempo de crise, fai falta risa...

Un solo abraço,

António Cangueiro

Almendra disse...

Tortulhas,
Gustei de ler, mas ne l fin nun quedarie melhor ...i dou ua chimpa...
Se hai quien conhece bien tue mai i tues tias sou you, ye berdade, giente buona, sérias i hounestas, mas tamien houmanas, cun defeitos cumo todos ls que nun pensamos an comer la maçana, para sermos diuses. Eilhas si que son i éran lhibros berdadeiros de la lhéngua i de la cultura mirandesas, fuonte de muito de l que anda por ende, mal cuntado i a serbir para outros se fazéren reis-chequitas. Que l sou nome quede cumo pessonas que fúrun amportantes para preserbar las tradiçones i la nuossa lhéngua, nun la aprobában na scuola, mas na scuola ansinaba-se pertués i tamien ls porsores d'hoije i an todo mundo, nun ansínan ua lhéngua i la déixan falar ou screbir mal.

Adelaide Monteiro disse...

Nun deixaba de ser defícel para ninos desses splicáren essa "queda".
Tu Alfredo dás-le siempre uns remissacos angraçados a las cuontas i dibulgas mui bien la nuossa lhéngua, l que tue mai i ls porsores nun pudírun ó nun quejírun.
Á pobo baliente que nun se deixou bencir pul que fui redicularizado.

Beisico,

Delaide

Ana disse...
Este comentário foi removido pelo autor.
Ana disse...

I depuis de miles i miles de anhos l que « queda » inda nas mentalidades an Bila Chana ou noutro sítio qualquiera subre essa « queda » ?
Puls bistos i cumo l títalo yá l deixa suponer qualquiera cousa de negatibo... Mas you spero que las porsoras nun se quéden por ende i saban dar a antender tamien, i hoije mais que nunca (Yá nun ye sien tiempo !), todas las cunsequéncias que essa cena tubo tamien para giraçones anteiras de mulhieres que fúrun cunsideradas durante seclos i cula bençon de l Eigreija cumo seres que era neçairo « adominar » yá que ye assi precisamente que las cousas son ditas .
Ye que ne l quadro, l home i la mulhier fúrun aparentemiente colocados ne l mesmo plano... mas ne l resto: por eisemplo ne l çcurso bíblico que ls homes (eilhes subretodo !)inda hoije parece que nun se fártan de repetir ?
Un çcurso misógino i redículo tamien !

Tortulhas disse...

Buonas nuites a tod'mundo!

Que Dius bos pague a todos las buossas buonas palabras, dadas de tan buona buntade i de buona fé.
Abraços.

Ana,
Cumo nun stou cierto que l agradecimiento de riba bos puoda abarcar a bós, agradeço-bos an separado, más nun seia pul fabor de ler i quemantar l que scribo; ambora, cun buossa licença pula franqueza, la buossa cumbersa i las buossas repetiçones yá déian un cachico a cediço.
Besitas

Ana disse...

Hai cousas que a uns nun cumbén de oubir...