Nesse eimbierno triste

Muorren-se de friu ls paixaros
quando a buscar de quemer
se l cólan las patas ne ls tourones
de eimbiernos tristes.
I la abe frie, de tan frie
yá nun registe
a las bandadas de farrapas
que l tápan las bistas
i la pónen an znorte.
Hai carambelo ne ls lhumes
hai çanceinhos nas camas
i hai un aire de riba
que todo lhieba.
Hai fuontes i rius ambaixo de l carambelo
i hai ua bielha que calece las manos
puxando la camisola
cumo se puxásse l filo al manelo.
Outra
abre la puorta miles de bezes
para se scapar
mas nun sabe cumo fazé-lo.
Todo ye triste
nesse eimbierno triste
an muntones de giente
sien sonhar
de passados çquecidos
de persentes einezistentes
an bandos metidos.