07/12/10

L outonho de l çcuntentamiento




Nun fusse you filho dua buona mai, que m’ansinou a tener modos, i staba eiqui a botar pragas que nien mouro.

Mas graças a eilha, culs eisemplos i las palabras sanas cun que m’eiducou, inda ando por ende sien perder las stribeiras.
Mas que ye custoso ye, un só le dá gana de boziar, de sacar de l pior bocabulairo que ten i berrar fuorte i feio até que las gorjas le duolan. Mas cumo sou giente de bien, porque sigo las buonas maneiras cumo fui eiducado, porque siempre me dezírun que bioléncia puxa mais bioléncia, porque l mal nun se debe pagar cul mal, eiqui ando you, cumo muitos, acabrunhado i anrezinado. Da mal cumigo i cun outros que se calha até nun ténen culpa nanhua, porque l miu pecado fui solo trabalhar, oubedecer, ser bien cumportado, cumprir cul que staba terminado, fusse regla ou lei, sien nunca poner squiera dúbedas, porque acraditaba, sien nunca ir para alhá de l bastante, cun fé nua belheç dina de quien fizo por eilha.
I hoije, ne l outonho de la bida, todo stá cheno de dúbedas, essa paç merecida, esse sfuorço dua bida botada al trabalho, als sacraficios i pribaçones stá cumpermetida, todas aqueilhas antençones que botei ne l feturo, seguro i melhor stá sbarrulhado.
Porque nada stá cierto, porque solo l que beio alantre ye ua scuridon, ye streito cumo ua caleija, porque la spráncia nas anstituiçones que m’ajúden a acabar ls dies cun denidade yá ye pouca, la cunfiança stá pulas puntas.
Agora passo l mais de ls dies, molendo i remulendo la rebuolta, l çcrédito, i por bien fuorças que faga an tener fé an dies melhores, que tamien era ua bertude que mie mai me deixou, nun sou capaç de fazer deilha la bandeira.
Perder la fé ye cousa mala, ye por esso que se diç que debe ser la redadeira, mas eilha nien simpre tira la fame, tira l friu i mos trai aqueilho que merecemos.
Ah cumo ambeijo la mai natureza, essa mesma que fai cun que todo se renuobe, essa que fai cun que ls fruitos amadúren, las fuolhas de las arbles amarielhen, essa que nun mos anganha, essa que quando l’amanhamos bien mos recumpensa cun l drobo ou trés bezes mais.

Mas mesmo que me baia ua baliente rebuolta acá andrento de las tripas que peçque só passa se me botar a scachar todo an pie de mi, nunca le bou a dar un zgusto a mie mai, nunca passarei de botar l miu çcuntentamiento, la mie zeiluson, la mie ampacéncia, ditar la mie amargura, que nun seia cun buns modos i buonas palabras.

5 comentários:

leonardo antao disse...

Buonas nuites Antonho Carrasqueiras.

Stá a acuntecer a la nuossa buolta “ua baliente rebuolta acá andrento de las tripas”

Stamos a bibir ua trasformaçon radical, probocada pul Sistema Financeiro Mundial que stá a la beira de l colapso i inda naide sabe l que benerá, ó cumo eirá acabar esta stória.

An Spanha, na Houlanda, na Anglaterra ó mesmo an Fráncia ls porblemas de las classes médies son quemuns, las pessonas stan andebidadas, a perder rendimientos, a perder fuorça social i capacidade d'anterbençon.

La Ouropa stá moribunda. L "Requien" de ls "sous balores dou-se hai dies na Irlanda.

Las carreiras profissionales stan mui anstables, cun mui menos ampregos i a obrigar ls de la classe média a tener stilos de bida mui mais modestos, i alguns a caminar pa la pobreza.

Nun t'apetece “dar un zgusto la tue mai, botar l tou çcuntentamiento, la tue zeiluson, ” i pragas que nien mouro?

Parabienes pul tou antressante testo.
Un arrochado abraço.
Leonardo

Almendra disse...

Gustei de l testo, mas nun stou d'acordo cun l que diç Leonardo porque l porblema nun ye de l Sistema Financeiro Mundial, esso ye l que dízen ls que quíeren anganhar la giente. L porblema ye l sistema Politico Oucidental, que trae la giente a perder tiempo cun squierda i dreita, buonos i malos. L que stá mal ye l capitalismo, la cultura de l çperdício, la cultura de las necidades arteficiales.
Todos quíeren bibir cada beç melhor, mas l que ye melhor?
Tanta telbison, tanta musica, tanto libro, tanta pintura, tanto retrato para eiludir, quando la naturaleza ye un libro abierto onde se puode ber todo l que la cultura arteficial de l'Oucidente quier sustituir, mas a la custa de tanta giente que nun ten que comer, de tanta giente sien saber ler, de tanta giente que solo sabe la musica de l choro, ls bersos de l cantar de ls paixaricos. La cultura que ye acontra la pena de muorte de l cuorpo, mas tols dies mata las cuncéncias, prende las eideias de ls outros. Se eileba chamando puls sentimentos de culpa de ls outros i que pon paredes a quien nun l cumbén que se beia.
L retrato ye bien la amostra de la politica Oucidental:
Quien ten buona teta mama i sta cuntente, mas quien nun ten adonde mamar solo le queda chorar i apuntar ls outros. Mas quien stá cierto?
Serie buono que ampeçasses a dar mais balor al garotico que nun ten teta.

faustino.antao disse...

Buonos dies

Tamien quiero deixar l miu comentairo, i como ls amigos Leonadro i Almendra s'adelantrórun, ampeço pul queilhes dezírun

Stá clarico, l que diç Almendra, cumo tamien dirie la mai de Carrasqueiras, ambora l comentairo de l amigo Leonardo nun baia tan fondo, steia mais raso, birado pa la queston monetaira

Diç assi l amigo Almendra "L que stá mal ye l capitalismo, la cultura de l çperdício, la cultura de las necidades arteficiales.
Todos quíeren bibir cada beç melhor, mas l que ye melhor?" todo l comentairo ye buono, mas este cachico ye perfundo, pon las nuossa cuncéncias a falar solicas, you acrecentaria, será que ls balores houmanos, las culidades de las pessonas nun cúntan?
L'eigualdade, fraternidade yá se muorrírun?
La eiducaçon stá toda pocha?

Este testo, mesmo puosto subre la carga personal (andebidual) de Antonho Carrasqueiras ten ua filosofie de l coletibo, (porque yá hai muita giente a bibe assi) anda por alhá muita pena (delor) de nun ber mais al de riba ua eiducaçon adonde cunte l afeto i l bien querer a aqueilhes que son nuossos armanos (semelhantes), ne l nacer, bibir i morrer.

Un abraço

leonardo antao disse...

Buonas tardes amigos Almendra e Faustino ,
Tamien gustei muito de l tou comentairo Almendra, que me parece eicelente, nomeadamente la repuosta que dás a esta queston "todos quíeren bibir cada beç melhor, mas l que ye melhor?" "tanta telbison,... mas la la custa de tanta giente que nun ten que comer"

Tamien acho que la (erótica) caricatura scolhida pul Antonho Carrasqueiras resume mui bien la politica anternacional "quien ten buona teta mama i esta cuntente, mas quien nun ten adonde mamar tierra le queda chorar i apuntar ls outros".

Tamien acho eicelente l comentairo de l'amigo Faustino, nomeadamente esta eideia "anda por alhá muita pena (delor) de nun ber mais al de riba ua eiducaçon adonde cunte l'afeto i l bien querer a aqueilhes que son nuossos armanos (semelhantes), ne l nacer, bibir i morrer".

Çculpai-me, mas you ansisto que la crise atual ye subretodo d'ourige eiquenómico-financeira. L çcuncerto an qu'entrórun ls mercados finaceiros ouriginou falhéncia s de bárias ampresas, oumiento seneficatiba de l zamprego an bários países, l'oumiento de la pobreza, de la zeigualdade social i de la scluson social.

Oumentou i cuntina a oumentar la defrença antre ls trabalhadores bien pagos i ls menos bien pagos, an special eiqui ne l nuosso querido Pertual, an que ls gestores públicos recíben un salairo cerca de 500 bezes superior al dun trabalhador médio.

Quien son ls respunsables por estas zeigualdades?
Quien ten poder para corregir las scessibas zeigualdades salariales de las ourganizaçones?

Quando ando la pie pulas rues de la cidade de Lisboua, dole-me l coraçon ber que ls pedintes (alguns ninos) i la pobreza anfantil stan a oumentar de die para die e qu'alguns son de buonas famílias cun pais zampregados, an risco de pobreza.

Este porblema de l'oumiento de las zeigualdades sociales i de la pobreza, deixa-me particularmente perturbado i a anterrogar-me:
L que fazer para reduzir este flagelo social?
Repensar la ética política i ampresarial?

Ua beç mais, agradeço ls buossos eicelentes comentairos, amigos Almendra i Faustino, cun un arrochado abraço,
Leonardo

Almendra disse...

Faustino,
Para ampeçar, oubrigado pul que screbiste, mas quiero aporbeitar para te dezir que staba a la spera de un comentário ne l testo de "Faustino-guardador de ganados", porque l fiç para ti. Bi l tou testo subre Carçon i lhembrou-se-me de Alves Redol i l sou libro "Constantino guardador de vacas e de sonhos" i cumo l rapaç tamien andaba triste, inda que outras rezones, fiç l testo i l bideo para ti.
Leonardo,
Tenes toda la rezon, mas bendo l porblema de la crise de la Ouropa i de la América de l Norte, mas ls bancos solo fázen essas cousas porque ls politicos quíeren i porque nós botamos neilhes para mantener l nuosso nible de bida. La maiorie de ls que ténen miedo, ye porque nun quíeren perder la sue bida burguesa i a muitos jornalistas tamien le dá muito jeito, assi cumo als senhores de las artes i de las letras. Mas la cultura solo l ye, se fur de l pobo, de todos i para todos.
Apuis cháman bárbaros als que çtrúen todo l que ten a ber cun essa cultura. Eilha nun le diç nada. Que le amporta Picasso ou ls libros de Saramago a quien ten fame i nun sabe ler? Trócan-los por un cacho de pan...