Monólogos de solidon

Era mui angraçada cun aqueilha maneira zanrascada i aquel modo de andar strampalhado!
Morriu-se quando tenie catorze anhos. Chubiu-le la menstruaçon a la cabeça.
Mas cumo fui isso, percurei ancrédula?!
Nun sei, se cálha molhou-se pul termo, mas diç que si.

Sona-me a stranho agora, mas nó para aquel tiempo an que ls bolhos nun crecien, nun se podie ir a lhabar an auga frie, nun se podie dar banho i muito menos lhabar la cabeça. Era normal que cun aqueilhas crenças, tamien fusse la certeza de la sue muorte.
L doutor fui chamado muita beç para eilha i dezie tiu Miguel: Yá nun somos capazes de la salbar anque l doutor nun tenga salido d'anriba deilha ua sumana!
An todo le pegában a tiu Miguel, an todico.
Eilha asparcie-se a tie Marie Tresa, sue mai, angraçada i buona mulhier que nien habie mais. Nien parece que Aleixo salísse deilha...
Morriu-se cuitadica i to l pobo tubo muita pena.

Ua beç, íbamos muitos pa l monte cun las bacas, alhá pa l alto de l Sierro, muita mocidade. Apuis, eilha diç mui çpachada: Bá, lhebai buns carolos que you nun botei l beche i apuis ourdenhamos la cabra para anriba de l pan.
Assi fazimos todos para quemer l carolo anchoquecido de lheite de cabra.
Naquel tiempo quien buie lheite?!