17/12/10

I soutordie cumo ye?


(Cumo serie buono se fusse assi!)


L mais de bós, quando lir las purmeira lhinhas deste testo (crónica) bai a tener ganas de zistir, parar, i quien sabe até mandar-le a dar ua buolta al bilhar grande, mas fágan un pequeinho sfuorço i acabai de ler-lo, bereis que digo las cousas sien querer ferir naide an particular, scribo andentro dun percípio plural, de respeito, tenendo só un oujetibo dezir l que penso i me bai n’alma.

Se fazirmos algua reflecion, quedamos anquemodados cumos mos quieren bender las cousas.
El ye fiestas, grandes galas, grandes farras an salones abeludados, lhuzes i lhuzes de todas las quelores, piçcando, apagando, nun frenezin diabólico, que un até se squece que ye de carne i uosso, se calha ye essa l’eideia.
Apuis bénen las personaiges, diga-se que hai muitos anhos a esta parte que son siempre ls mesmos, pabonéian-se que nien prus ou pruas, metidos an fatiocas angomadas, caras, mais caras que l dinheiro que antra an muitas casas de família, caçoando i rindo que nien “robertos”, esses que çcúlpen que inda tenien algua outelidade cultural, ban botando de la boca para fuora todo al que le dá la gana, porque pa la cadena nun ban.
An nome de la solidaridade, que ye ua cousa tan guapa, alhá ban pedindo denheiro para ls necitados, ls zbalidoss, ls anfelizes, que telfónen ou aposíten.
Cúidan que to l mundo ye simprico, cúidan que nós nun sabemos que bundaba haber çtribuiçon justa, repartiçon hounesta i nun habie mais probreza, cúidan que nós nun sabemos que esses que s’aparbálhan ne ls eibentos i ne ls trabiados de las telbisones, cousa que ye paga pul pobo, son ua parte de ls repunsables, cúidan que nun sabemos queilhes gánhan mais nun més que muitos nun anho, que ye na defrença que stá l’ourige de la probreza.
Gánhan milhones, ténen l lhugar assegurado i caliente, amostrán-se a nós, al mundo, cumo alguien que ganhou l cielo na tierra.
Quantos de bós díran que me deixe desso, que siempre hoube probes i ricos, mas que mensaige ye essa, só porque siempre hoube probes i ricos, yá nun se fala nestes podres dua sociadade que nun ten arremediados. Só porque hoube siempre maleitas, debemos dezir a la ciéncia para nun andar percurando malzinas?
Ser rico nun ye tener muito, ye ser justo, nun querer pa ls outros aqueilho que nun queremos para nós, será que ls ricos gustában de pedir smola?
Ye ua pena, mas muito mundo sabe tan bien cumo you, smola ye la bergonha dua sociadade que nun ye capaç ou nun sabe repartir cun justícia, i nien serie perciso que l quenhon fusse eigual para todos, dar smola nun ye ser solidairo, smola ye senhas de fraqueza.
La sociadade que ten que dar smola, yá nun ten nada mais para dar, essa ye la redadeira cundiçon antes de la falhéncia, la muorte.
Solidaridade ye dar cundiçones al nuosso armano, bezino, cunterránio, cidadano d’acá ou de fuora, para que tenga las mesmas scolhas, las mesmas ouportunidades, i dende la paga justa, para que chegue para se sustentar i sustentar ls sous cun denidad, s’eiducar i formar.
Esso nun se fai cun smolas, la smola só resolbe l porblema d’hoije i manhana, cumo ye?
Ye buono, ye guapo ajudar, anfeliçmente tenemos que l fazer, porque se nun fur assi, se nun fúren las furfalhicas d’alguns, todos aqueilhes que yá stan subre l’agonia, l sou afogamiento stá cierto
Apadrinán-se i pormóben-se hoije tantas i tantas fiestas de gala, que ánchen ls uolhos de l mundo, só para nun admitir que l que stá mal ye este modelo, que permite que uns ténen muito i outros nun ténen nada.
Nien cumo modo de arrependimiento, estas galas sírbin, arrependimiento ye un ato de ampeinho para nun cuntinar a fazer l mesmo, ye un ato de cumpremisso para que demude l que stá mal.
Porqui limpassado por esta temporada yá bi ls mesmos, se stában bien scarranchados i anfarinados, agora nun l stában menos.
Nada demudou i se demudou fui para pior, l bui ten que ser agarrado puls cuornos.
Assi, quien tenie fame, fame bai a tener soutordie.

2 comentários:

Almendra disse...

Ye miesmo assi cumo dizes. Agora si stou cumpletamiente d'acordo cuntigo. Mas tenemos que cuntinar a tener corage de falar, screbir i fazer cumo l garotico que gritou que l rei iba amplache.

Abraço
Almendra

Ana disse...

L que cunta ye que haba justícia : esso si ye berdade !
Gustei de ler l buosso guapo testo i nun hai que zestir !