31/01/16

Ls pertueses: Somos probes ou pouco listos?




Un die un amigo miu de “Nova-Iorque” passou por Lisboua (que para alhá de la capital tamien coinhece bien pertual) quedou an mie casa, i quando you le dixe que ls pertueses son mui probes…



Delantre de las mies lhamúrias dixo-me assi:

-Cumo puodes dezir-me que ls pertueses son probes, quando sodes capazes de pagar por un litro de gasolina, mais de l triplo que pago you?

-Quando bos dais al luxo de pagar tarifas d'eiletricidade i telmobles 80% mais caras que you pago an Nova-Iorque?

 -Cumo puodes dezir que sodes probes quando pagais comissiones bancárias por serbícios i cartas de crédito al triplo que pago you an Nova-Iorque?

-Ou quando puoden pagar por un carro que a mi me custa 8.320€ i bós pagais 20.000€, pul mesmo carro?

-Puoden dar de persente 11.640€ al buosso governo?



Nós alhá an Nova-Iorque ye que somos probes:

Alhá l governo tenendo an cuonta la miséria solo cobra 6€ de IVA, cousa que nun ten cumparaçon culs 23€. I assossegados cumo stais inda pagais ampostos menucipales.



Un banco pribado, que faliu, roubado por uns quantos, bós que nun teneis nada cun esso inda pagais pa l sacar de l galaton.



Bós pagais al buosso Gobernador de l Banco de Pertual, un soldo que ye trés bezes mais que l que ganha l Gobernador de l Banco Federal de ls EUA…



Mais te digo:

 Assi sendo, probes somos nós, ls que bibimos ne ls EUA. Puis bós poneis ls buossos filhos a studar an scuolas pribadas, pagas pul Stado, anquanto ne ls EUA las scuolas públicas ampréstan  ls lhibros  para daprender.



Apuis dun bun rato de cumbersa ancerrou assi:



Bós nun sodes probes?

Gástan mui mal l buosso dinheiro!

Bós pertueses, nun sodes probes, nun sodes ye miu listos!



«Dá que pensar sendo pertués cumo you sou»

26/01/16

Cuonta



Un nabiu de piratas nabegaba ne l mar Índico adonde fai muita calma habie meses d’afilo sien s’arrimar a tierra firme.

Ls marujos, porque l’auga doce se tenie acabado habie muito tiempo, nun se lhabában nien mudában de bestes, por todo esso l nabiu yá fedie!

L capitan mandou parar l nabiu i chamou l “eimediato”(segundo capitan):

-Senhor Mascarenhas, l nabiu fiede, mande ls homes trocar de bestes!

Respundiu l eimediato:

-Si, si senhor….

Bota-se a reunir ls marujos i diç:

-Marujos, l senhor capitan stá de bentas por bias de l feder que hai ne l nabiu i manda que todos troquem las bestes.

Antonho troca la camisa cun Jermias, Plinio troca las calças cun Juan … i assi teneis que l fazer todos.

Quando todos yá tenien feito las trocas, tornou l falar cul capitan i diç:

-Senhor, todos yá trocórun de bestes.

L capitan, mais alibiado, dá la orde de cuntinar la biaige pur esse mar afuora.
  


  

Moral de la cuonta:

-Nun ye la política que fai l candidato birar fala-barato, léria, lérias, troca tintas, antrujon, ye l boto de l pobo. 

25/01/16

Nunca sabemos todo.






Era ua beç un mecánico que staba amanhando la cabeça de l motor dua motorizada, quando biu un senhor doutor cirujon de l coraçon de grande nomeada na sue ouficina.
- El, l doutor mira muito para l mecánico que stá a trabalhar.
- Anton l mecánico parou de trabalhar i perguntou-le.
- Buonos dies senhor doutor, puodo fazer-bos ua pergunta?
L doutor cirujon mui surpreso achegasse a la moto adonde l mecánico staba a trabalhar i repondiu, si podeis fazer.
 L mecánico alhebanta-se:
-Mirai para este motor. You abro-lo, tiro las pieças, amanho-las i pongo-las ne l sítio. Acabado que steia l serbíçio pongo-lo a trabalhar i trabalha cumo se fusse nuobo.
Splicai-me porquei you ganho tan pouco i l senhor ganha muito quando l trabalho ye quaijeque l mesmo, tan asparcido.
-Anton l doutor cirujon de l coraçon, dou-se la risa abaixou-se i diç mui baixico pa l mecánico de motos:
- Bós yá spurmentes-tes fazer cumo you fago, cul motor a trabalhar?
Moral de la cuonta:
Quando cuidamos que yá sabemos todas las repuostas, ben la bida i demuda todas las perguntas.

 

19/01/16

Coisas que you guardo i quiero partelhar.







https://www.youtube.com/watch?v=FY69fQ5qpaw

 (calca ne l link para beres l bideo)


Este bideo fui feito ne l ato d'abertura de la sposiçon de scultura "MAÇCARAS-A DUALIDADE de l scultor mirandés (de Sendin) José António Nobre, que stubo a público (20.03.2011) na Sociedade Nacional de Belas-Artes, rua Barata Salgueiro 36 -Lisboa.
L bideo solo amostrou l momiento anque ls amigos de l scultor dórun ua seinha de la sue gráç
ia tocando ua moda cula gaita de fuoles, caixa i bombo.
  Fui ua sposiçon chena de quelor, lhuç i bida que muito angrandece l'arte, la cultura i la lhéngua mirandesa.