Dicas de la Anterneta

Ua beç yá tenie falado de l porgrama Dicas de la Anternete mas pa dezir que se tenien squecido que l mirandés ye ua léngua de Pertual. Agora peç que quedou amanhado l squecimento. Un bien haia pa l porgrama bá i pa l apersentador (que nun anganha a naide i bien se bei que ye de l Norte de Pertual).

Eiqui queda la ligaçon pa l Blogue de l porgrama Dicas de la Anternete de la RTP(N) i la reportaige que fazírun subre l mirandés na anterneta:

Ua léngua de l Mundo i talbeç de Pertual

Stube hai pouco tiempo a ber las Dicas de Internete na telibison anquanto quemie qualquiera cousa i beio ua ambora subre l Verbix; que dixo na reportaige que daba pa cunjugar berbos an mais de 100 lénguas. Solo amostrórun que daba pa Pertués. Squecírun-se que Pertual tamien ten l Mirandés.

Mas buono; al menos you fui a ber i si daba pa Mirandés i fui grácias a la ambora de la RTP que çcubri. Queda eiqui anton la ligaçon:
Verbix pa Mirandés(aparece uas cousas stranhas; mas peç que si funciona l mais de las bezes).

Yá deixei un comentairo i uas sugestones nas Dicas de Anterneta; a ber que sal dende.