26/08/18

Acunteciu pul terceiro anho seguido




Fui ne l die 12 deste més d'Agosto - a la tarde - pula terceira beç, tal qual acunteciu ne ls dous redadeiros anhos.

Ancerida nas atebidades culturales i çpotibas que l'Associaçon Cultural "Sol Nascente" - Zenízio - pormobe ne ls beranos tamien astanho se fizo ua sesson birada pa la dibulgaçon de la Lhéngua Mirandesa i salimiento de l lhibro "A Saber de Zenízio".

Cun palhestra de l eilustre porsor Domingos Raposo, que siempre ten stado çponible, adonde çtacou par'alhá de muitas outras cousas l balor cultural i patrimonial de l mirandés cumo eilemiento d'eidentidade dun pobo, l'amportáncia de l cuntinar a falar, de l ansinar, daprender i screbir. 

De l'amportáncia de l lhibro - obra qu'ajunta decumientos de l'ourige de l'aldé, crónicas de sou património menumental i tradiçones, cuontas screbidas por pessonas de Zenízio - falou l cunterráneo, l cura Basileu Pires que conhece bien todas las caratelísticas de l'aldé i sues gientes. 

L'assemblé stubo atienta a todo, puis sabe que palhestras, ansinamientos cumo estes, dados por pessonas que mos son tan queridas nun se ténen to ls dies.

A eilhes mais ua beç ls nuossos agradecimientos pula çponeblidade i antrega.

L'Associaçon, pessonas i anstituições persentes, la cultura i la Lhéngua quédan reconhecidas.

Pa l anho que ben, quedou la pormessa de ls respunsables de l'Associaçon i Associados trabalhar para que haba mais, mantenendo assi bibo l sprito que l Mestre Amadeu Ferreira - que yá nun stá antre nós - querie, quando pula purmeira beç an 2009 fizo la purmeira palhestra i pormobiu l salimiento de lhibros n'aldé de Zenízio.

Cada sesson, cada salimiento que an Zenízio se fazir, stá a fazer-se justíçia, reconhecimiento a la mimória de ls nuossos antepassados que tubíran l mérito de mos deixar tan guapa i fuorte hardança, l mirandés.

Puode nun parecer muito, puode nun tener amportáncia para alguns, mas ten un balor que naide puode nien ten dreito de çpreziar.

Biba Zenízio, tierra sien pareilho.
Biba la Lhéngua i Cultura Mirandesa.






05/08/18

Anformaçon /Informação - Atebidades Relegiosas, Culturales i Çportibas



Eiqui deixo l’anformaçon de l calendairo de las fiestas i atebidades Relegiosas. Culturales i Çportibas de Zenízio i Speciosa – (Agosto/Setembre 2018)

Die 11 d’Agosto fiesta an honra de Santa Bárbela i San Bartelameu an Zenízio.
    - A la purmanhana peditório pul pobo cun geiteiros
    - A las 14.00 horas missa solene i porciçon
    - L arraial será animado pul conjunto -Música Folclórica Paulo Raízes e o D.M.


Die 12 d’Agosto caminhada pul termo de Zenízio
     - A meia manhana un pequeinho/almuorço (a meio de la caminhada)
     - A meidie almuorço ne l salon de la Junta de Freguesie
     - A la tarde palhestra de mirandés i salimiento de l lhibro “A Saber de Zenízio” 


 

Die 13 d’Agosto fiesta an honra de San Gregório na Speciosa
     - A la purmanhana peditório pul pobo cun animaçon musical
     - A las 13.30 missa solene i porciçon
     - A la nuite arraial cun grupo musical

Die 14 d’Agosto an Zenízio
     - A la tarde jogo de bola Sulteiros/Casados
     - A la nuite “Cena de l associado”



Die 15 d’Agosto – Zenízio
    - Jogos tradecionales ourganizados pul’Ass. “Sol Nascente”


 Die 06 de Setembre - Zenízio
 - Passeio de BT de Zenízio anté l Naso cun almuorço
…………………………………………
Meses -Agosto e Setembro

 Dia 11 de Agosto festa em honra de Santa Barbara e Stº Bartolomeu de manha peditório com os gaiteiros as duas da tarde missa solene e precisão, a noite arraial animada com o conjunto (Musica Folclórica Paulo Raízes e o D.M.) dia 12 de Agosto passeio pedestre pelos caminhos do nosso Termo, meio da manha pequeno almoço em local apropriado, ao meio dia almoço organizado pela comissão de Festas , de tarde será lançamento do livro  ( Saber Zenísío) Dia 14 jogo de futebol casados contra solteiros, a noite( O jantar do sócio) Dia 15 de Agosto jogos tradicionais organizados pela Associação Sol Nascente , e dia 06 de Setembro passeio BT de Genísio ao Naso com almoço a chegada

Na Especiosa temos dia 13 Agosto em honra de  de Stº Gregório de manha peditório com animação musical 13.30 horas missa solene e precisão  a noite arraial animação com grupo musical