28/04/17

Anformaçon / Informação





L’Ounibersidade Senior de l Seixal (Unisseixal) drento de l “Plano de Actividades pa l més de Maio”. Agendou pa l die 24 (quarta feira) a las 17.00 horas, ne l Ouditório de la Junta de Freguesie de Amora-Seixal. Ua sesson subre la “Lhéngua Mirandesa: Cun salimiento de l lhibro “Meia Ambuça de Cuontas”, palhestra i anterbençon de António Cangueiro.


Stá assi mais ua beç, a eisemplo de ls anhos datrás, de parabienes la Lhéngua i Cultura Mirandesa, pulas manos de ls repunsables desta Anstituiçon (Unisseixal) que acarina i pormobe l ansino i cultura.


Ye de lhoubar, l'abertura i aceitaçon que la Reitorie çponibliza na dibulgaçon deste património cultural que ye la Lhéngua i Cultura Mirandesa. Será pula cierta mais ua sesson adonde l’amportáncia de screbir i publicar an mirandés nun será squecida.  
____________________________________________

(Em português)

A Universidade Sénior do Seixal (Unisseixal) dentro do “Plano de Actividades do més de Maio”. Agendou para o dia 24 (4ª feira) as 17.00 hn no auditório da Junta de Freguesia da Amora-Seixal uma sessão de Lingua Mirandesa: Lançamento do livro “Meia Ambuça de Cuontas” com palestra e apresentação de António Cangueiro.

Esta assim mais uma vez, a exemplo de anos anteriores, de parabéns a Língua e Cultura Mirandesa, pela orientação dos responsáveis da instituição que acarinha e promove o ensino e cultura.

É de louvar a abertura e aceitação que a Reitoria disponibiliza para a divulgação deste património cultural que é o mirandês. Será pela certa mais uma tarde cultural, onde a importância de escrever e publicar nesta língua não será esquecida


24/04/17

Çpenhica miolhos

video

Probe de quien ye pequeinho!
Anté ne l mundo de ls alados, de la mesma spécie, nun come, nien dreito ten a çpenhicar un cachico de pan.
Quien ye pequeinho i probe anda quaije çpido, nien uas forfalhicas le tócan d'almuorço.
Çpenhícan-le ls miolhos.

Nun sei se hai algua cuonta agarrada al dito dezideiro - pica miolhos - an mirandés.

Hai ua an pertués, mui squerosa.
Dous tius que bibindo solicos sien ties, nua ilha hai muito tiempo, un deilhes ambentou que tamien alhá bibie ua abe taluda de bico grande i afilado que le gustaba quemer miolhos.
L outro cun miedo, fizo ua pequeilha foia para scunder la cabeça.
 L bardino sabendo de l miedo, eimitou l gralhar d'ua abe. 
Cun arrecelo alhá fui scunder la cabeça, quadando de culo pa riba i a jeito. 
Aporbeitou-se.....
El bien boziaba, çpenhica çpenhica q'anté chegares als miolhos inda tenes muito que çpenicar.

De nada serbindo.


23/04/17

La lhienda de ls quatro fés

 

 Quando Don Pedro, Amperador de l Brasil, quijo acertar uas antrequidéncias cul armano Miguel, biaijou a Pertual an carabelas.
Sabendo-se an Lisboua de las sues ganas, tapórun l’antrada de l riu Teijo, assi sendo fui-se a poner ls pies an chano firme eili pa ls lhados de l’Eiriceira, na praia de las Maçanas.
 Apuis de muitas dies de biaije ne l mar, l quemer nun era muito, i l que habie nun era grande cousa, lhougo que se sentiu firme, percurou ancuntrar onde podie zferrar ls dientes.
  Bendo ua taberna de puortas abiertas, ende antrou i dixo pa l taberneiro:
 You querie quemer, bengo de mui loinge cua fame de lhobo, l que teneis?
 L cuitado de l taberneiro, al ber que tenie a la sue frente alguien de tamanha nomeda, respondiu-le:
 - Sabeis Sue Alteza Real q’eiqui tenemos mi pouco, puis somos mi probes, i solo hai aqueilho que l buosso pobo chama de trés fés.
 Fanecas Frescas Fritas!
 L Amperador delantre de tanta houmildade i cula fame rujindo la tripa.
 Respundiu-le:
 Pus na falta de melhor béngan dende las Fanecas Frescas Fritas.
L taberneiro serbiu l Amperador Don Pedro de quanto quemido quijo.
 Quando acabou de quemer, yá mais recumpuosto.
 Don Pedro lhebantou-se i aceinhou pa l taberneiro.
 Mira que si stában buonas, quemi que me regalei i fartei, yá staba percisando dun acunchego destes apuis de tantos dies de biaije.
Só que hai un porblema, a la quemida de ls trés fés tenemos q’ajuntar outro fé.
 L pobo bai a tener que batizar este quemido de quatro fés.
 Fanecas Frescas Fritas Fiadas, porque you agora nun tengo crouas para te pagar.
 Assi quedou la lhienda de l quemido de ls quatro fés, que solo ye serbida s’amostrar purmeiro deinheiro para pagar.
 Nunca se sabe s’ándan por ende mais armanos de Don Pedro.

 

08/04/17

Botos / Votos

Páscoa Feliç / Páscoa Feliz



Que téngan ua buona Sumana Santa i Páscoa Feliç, an paç, cun salude i alegrie na cumpanhie de buossos familiares son ls mius deseios i de mie família.

 Que tenham uma boa Semana Santa e Páscoa Feliz, em paz, com saúde e muita alegria na companhia de vossos familiares são os meus desejos e da minha família. 

03/04/17

Património eimaterial






Hai património, an special l eimaterial, que se morriu de beç, ou seia nun mais s’usa nien se pratica. 

Todo esto ten a ber culs modos i maneiras de l nuosso die a die.

Este fin de sumana, stube cun amigos i amigas bien achegadas, tan achegadas que l mie tie cunsidra, armanos, armanas, subrinas i nietas nun almuorço i las çculpas fúrun i son siempre las mesmas, saborear botielhos cun bainas.

Mas nun fúrun ls botielhos que fazírun lhembrar l património eimaterial mas si la fogaça que se puso na mesa i se cortou a las fatilas.

“Siempre mie falecida mai, que Dius tenga i que solo coinciu de mundo anté Muncuorbo, quando partie ua fogaça beijaba, daba grácias al Debino Sprito Santo tener-lo, pedindo que nunca faltasse i disse fartura a la família”

Fui desse i muito mais património eimaterial que falemos, durante l repasto.