24/07/13

Ua Biaje

Nun querie deixar de partilhar cun bós ua cousa bien engraçada que me acunteciu hai bien poucos dies.


Staba you na Croácia, un paiç bien guapo que bos acunseilho a besitar. Antandi ua cousa que solo se cunheçe quando se stá alhá. Trata-se cumo se sabe un paiç de la antiga “Jugoslávia”. La guerra de la andependência dou-se hai binte anhos, i agora si pudo-bos dezir que las marcas alhá stan. Hai inda marcas an casas e ruas, mas nun ye dessas marcas que bos falo, i de las outras que fican para siempre nas pessonas. Ye quaije doloroso oubir alguas pessonas falar desso. Outras nun quiran dezir nada, i ye solo por razones profissionales que amentan na guerra. Yá alguin dezie que apuis dua biaje ficamos mais ricos.

Mas inda ye d´outra cousa que bos quiro falar, anton la cousa passou-se assi:

Staba you a falar cun la guia de Pertual e lhembrei-de de le perguntar ua beç que habie studado an Pertual durante três anhos se sabie que nós an Pertual tenien-mos duas lhénguas.

Oulhai la respuosta deilha.

Sei!,... Sei, ye l Mirandés.

Durante un cachico fiquei sin respuosta, pus anton ua Croata sabe de la eijistência de l mirandés, E cuncluiu la sue respuosta.

La próssima beç que fur a Pertual quiro besitar Trás -os- Montes

Cumo you me senti cheno de proua quando le dixe que you l sabie falar e screbir.


Valter Deusdado

18/07/13

VI ANCUONTRO DE BLOGUEIROS DE L PRAINO MIRANDÉS/VI ENCONTRO DE BLOGUEIROS DO PLANALTO MIRANDÊS




L die 17 d’Agosto tenemos l VI ANCUONTRO DE BLOGUEIROS DE L PRAINO MIRANDÉS.

Cumo todo mundo sabe l PRAINO MIRANDÉS agarra ls Cunceilhos de Miranda de l Douro, Mogadouro i Bumioso.

Astanho l Ancuontro bai se fazer an BIEMPOSTA.
L porgrama, a sou tiempo salirá, agora yé solo para dar la nuoba a todo l mundo i assi ampeçáren a fazer las anscriçones. Tamien ne l face book, se stá a dibulgar.
Las anscriçones puoden ser feitas ne ls comantairos.
 .....

No dia 17 de Agosto temos o VI ENCONTRO DE BLOGUEIROS DO PLANALTO MIRANDÊS.

Como é do conhecimento de todos o Planalto Mirandês abrange os Concelhos de Miranda do Douro, Mogadouro e Vimioso.

Este ano o Encontro vai realizar-se em BEMPOSTA.

O Programa, a seu tempo saírá, agora é somente para dar a conhecer a todos o evento e assim começarem a fazer as inscrições. Também no Face book se está a divulgar.
As incrições podem ser feitas nos comentários.

Ls mardomos

ACangueiro/JAlmendra

14/07/13

LHABRADOR DE TRATOR


LHABRADOR DE TRATOR


Nun ye un poema de trator
Que alinhado an die de Sol
Ye lhibre piensamento al bento
Que bagueia sien cuntrol.

Ye un poema que que lhabro
Muntado an miu trator
Oubindo l cantar dels paixaros
I l bruído de l miu motor.

Pachorrenta fuorça mecânica
Que se arrasta na planura
Rasgando l chano i la tierra
Para todo quedar a la altura.

Rebuolbendo l chano inda húmido
De la chubada mais reciente
Mais alto fala porén
La palabra na mie mente.

Ten la boca al pie de l coraçon
Ambora you dubide que seia
Oubida pur mais alguien
Pur mais perto que esteia.

Sumeio anton l saco de pan
Que custa s oulhos da cara
Amassado assi cun petróleo
I la semanteira queda mais rara.

I l sudor de rosto sudado
Pe l pesado motor de sploson
De l nacer al puoner de l sol
Alhá anda hlabrador anton.

Purque ye insaciáble la ganância
De benir a cuolher resultados
Que bai sumiando eilusones
Nels coraçones yá lhabrados.

Nun amporta la corrupçon maldita
Que mata giente pur toda la parte
L lhabrador bai eignorando
Que para isso el ten arte.

Na Ouropa, i ne l Brasil
I talbeç tamien nel Eiraque
Adonde houbier lhabradores
Alhá andan eilhes al ataque.

An pecinas d´alabastro
I se afogan an toda la suorte
De ansaciábles bícios i lhuixos
Que só puonerá termo la muorte.

Pur agora apenas beio puolareda
Á la mie ruoda bien atento
I paixaros sgarabitado la tierra
Á prócura de l sou alimento.

Streilhas aparecen mais tarde
Ne l cielo quando l die cair
I la nuite se lhebantar cula Lhuna
I l LHABRADOR TENERÁ que fugir.

José António Esteves


09/07/13

Á agricultor de palabras!!!

 

Nun bés poeta,
l poema stá d´adil a tue spera!
Relba las rimas,
bima ls bersos
porpara l sembrador de las palabras,
l rastro,
l arado,
la junta de bacas.
 

Por anquanto,
l poema çcansa an cama de marfolho,
i fuorte benirá
a tener cun l sou

agricultor de palabras!!!

08/07/13

Gosto de lhobos



Cuido que yá me cunfessei mais bezes. 
Mesmo assi nun me canso de l dezir, i se nun stubisse ancerrado antre quatro paredes a pie de l computador até boziaba bien alto cumo sembas de bezes l fiç quando andaba pul *Cabeço de l Relhuzedo, *Malhada de l Naso, *Cabanha, *Ourrieta Cuba, la *Gaga, *Pandon i muitos mais.

Por esse animales guichos, guapos, anteligentes, de quatro patas capazes de bater lheugas i lheugas de termo, d’uolhos lhancentos, d’oureilhas spetadas i guichas, sou capaç de boziar bien alto até que las gorjas me duólan, que nun podemos deixar queilhes zaparéçan para siempre que tenemos que eibitar la sue stinçon .
I mirai bós que you fui pastor, i nun fui un die, fui ua bida, quando naci yá an mie casa habie ganado i fui atrás del al chin chin de mie mai que me criei, you até m’astrebie a dezir que naci nua cabanha. 

Anton era causo para dezir que habie de ls oudiar, porque ls lhobos son ls einemigos de ls pastores? 

Al lhargo de las muitas dezenas danhos que tubimos ganado, l verdadeiro sustento de la mie família, eilhes roubórun canhonas i cordeiros que mos fazien falta i éran l nuosso sustento, mas nien mesmo assi sou capaç de les querer mal, a esses animales de quatro patas, selbaiges, que son parte de la natureza, que l mais de las bezes solo mátan para quemer (mesmo que an alguas temporadas eilhes fágan muitos stragos) nun sou capaç de ls oudiar. Quando hoije yá bielho trago al de riba alguas alhembráncias de l miu tiempo de pastor, sinto delor de ls males que se le fazien, de nun antendermos este animales.

I ye causo para dezir quanto mais conheço de la bida, mais gusto de ls lhobos, eilhes roubában, róuban i matában por anstinto para bibir cumo spécie, son listos, ourganizados i bíben an sociadade, mas you quanto mais conheço de la mie, mais perdono ls lhobos. Mais digo, desta sociadade que ten alguns houmanos, que se pórtan cumo lhobos, ou pior, só que estes son de dues patas, nun sou capaç de fazer nada para que nun zaparéçan, que la sue spécie deixe de eisistir, que la sue stinçon seia l mais debrebe possible, nun sou capaç de fazer un solo géstio para bien de l sou feturo.

Serie mui malo haber un mundo manhana, i nós nun teneriemos l perdon de las geraçones feturas, se deixarmos zaparcer ls lhobos (de quatro patas) essa spécie selbaige que ten l’amenaça de stinçon, será mui malo se habir un mundo manhana, i nós nun teneremos l perdon se nun stinguirmos estes lhobos (de dues patas).
*(chamadeiros de l termo de Zenízio)

07/07/13

Angolir mais de meio-quilo de chicha nua só refeiçon !




 Cumo todos sabemos, l Mediterráneo 

inda nun ye un mar fechado...



You questumo ir al site de l Sapo para tener alguas amboras subre Pertual i fui ende (ber aqui) que reparei que habie un artigo relacionado cun Bergáncia i un jantar que puls bistos nun passou de forma ningua zapercebido, subretodo ne ls tiempos de crise que bibimos muitos hoije; jantar esse an que fúrun cuntabilizados nun só l número de participantes (mais de mil pessonas) cumo tamien las cuntidades ampressionantes de chicha de bitela (700 kg para l'oucasion ! Un rebanho anteiro quaije!),  cuntidade essa de chicha,  se furmos a ber, cunsiderablemente mais amportante que la de las patatas (260 kg ), cumpletada cun  400 kg de melones, de melancies i outros angredientes...


Fazendo las cuontas, parece anton que an média, nesse tal jantar, ls cumbibas angolírun nada mais nada menos que mais de meio-quilo de chicha  (que nun ye cumo todos sabemos ua de las mais baratas), 700 gramas até se éran pouco mais de 1000 ls cumbibas...



La pregunta crucial que se pon anton ye esta:



Haberá por acaso crise, cumo muitos i muitos dízen, todos ls dies i a toda la hora, nesse país que ye Pertual, al punto (nun hai que squecer esso) de muitos (jobes percipalmente) nestes últimos tiempos tenéren acabado por deixar l País, eimigráren, procuráren outros hourizontes i outras mentalidades talbeç tamien ?



Nun serei you a responder porque tamien nun ye ende que you moro i trabalho hai mais de 40 anhos agora mas ua cousa ye cierta. A mi, hai amboras que me cháman muito l’atençon, me surprénden i para bos dezir la berdade me dan bastante na realidade ganas quaije de agomitar!



Ye Domingo, i pa l meio-die cuntentarei-me cun dues sardinas (talbeç até só ua) purparadas a la mie moda...



I talbeç, cumo essas dues sardinas (quando éran bibas...), culas altas temperaturas que tenemos nós tamien nestes dies anque bien menos eilebadas an França assi i todo que an Pertual , pensarei you tamien nun bun mergulho nun mar de auga fresca adonde a aqueilhes que son capazes, an ciertos sítios, de quemer 700 gramas de chicha dua só beç (chicha houmana até por bezes...) se le dá a essas spécies de peixes, ou de animales, l nome finalmente bien sugestibo de “tubarones” !! 



03/07/13

SANCHA


DICIONAIRO EILUSTRADO DE MIRANDÉS





SANCHA - s. f. - L mesmo que CARRAPATA; 1 - bicho de la família de ls acarídeos, que se apega a la piel de ls animales i nun se zapega anquanto houbir sangre que chupar. 2 (fig.) Pessona apegadiça, que nun zlharga mesmo que l'ampónten. Eis. L PM ye cumo ua sancha!


01/07/13

Un camaleon chamado Barroso





Oubi un jornalista dezir, hoije pula manhana, na rádio France Inter (la rádio cula maior oudiéncia an França):

José Manuel Barroso (Ye mui ralo an França las pessonas usáren ls dous apelhidos “Durão Barroso”)... : aquel que nun diç quaije nada an 10 lhénguas !” (Celui qui ne dit presque rien en 10 langues !)

Se tubisse tiempo, tamien bos falarie por eisemplo dun artigo eiditado ne l 19 de Junho passado ne l jornal Le Monde an que l inda atual Persidente de la Commisson Ouropéia ye pura i simpresmente acumparado a un camaleon !

Mas se todo esso acunteciu ye porque uns dies antes parece que esse nuosso cumpatriota ("dotado de la faculdade de mudar de cor")  achou que la posiçon de la França era “reacionaira”... Só porque la França quier  cuntinuar a defender, an relaçon a l’heigemonie i al peso de ls Stados Ounidos, antre outras cousas tamien l sou cinema que repersenta ua riqueza económica i cultural sien ningua dúbeda.

L que quier Barroso afinal ? Que acunteça an França la mesma cousa que an Pertual adonde féchan salas uas atrás de las outras cumo yá acunteciu an Bergáncia por eisemplo ?

L’Ouropa, nessas cundiçones, repersentada por alguien ancapaç de la repersentar corretamiente (tenemos mais ua proba eibidente!) poderie correr sérios perigos se naide reagisse. Mas ye ampossible nun reagir. Ye l que stá a acuntecer. Tamien neste cuntinente yá ye tiempo que ciertas cousas múden. Para salir de la situaçon an que stamos. Que só antressa a alguns.