L scanho alhá stá...

L miesmo scanho, las miesmas tanazes, l miesmo fol a abibar mimórias assoprando la cinza de l çquecimiento.
Si mie nina, tu bien bés que la bida ye dura, anque la baca te scorne, tenes que ir cun eilhas. Nun tengas miedo de l lhobo, las cuontas que oubes al serano solo se pássan de nuite i, tu buolbes de die. Bóta-las antes de l çponer de l sol para chegares inda cun die a casa…
You assi fazie mas a las bezes ambaie-me cun algo i fazie-se-me de nuite pul camino. Quando assi era, de todas las selombras se me fazien lhobos i, acagatada agarraba-me al rabo de la Cordeira que era ua baca an quien se pudie cunfiar, alrobés de la Mourisca i toca a scatrapulhar cun eilhas, por aqueilhes caminos adelantre. La burra cinza tomaba siempre la delantreira.
Se algun die bires un lhobo ne l cerrado, bai pal meio de las bacas porque eilhas te porteigerán, cumo ua beç fazírun cun un bitelo. Fazírun ua ruoda, metírun-lo ne l meio i todas cun ls cuornos a caras a fuora para qu´el nun arremetísse acontra l bitelico, até que el se fui.
Outras cuontas cuntadas, outra bida de buieiros acumpanhados de sous abós, ranas apanhadas cun canhas i un cibico de çamarra de bacalhau, xardas na ribeira de Angueira, abinturas de berano que siempre lhembrarán. Outras cuontas oubidas ne l mesmo scanho, nó de lhobos, mas de eilefantes, lhiones i lhiopardos que l fazírun medrar l eimaginairo de ninos.
L scanho stá alhá, l fol i las tanazes tamien. Que cuontas cuntarei you als mius ninos neste mundo de jogos an cumputador i an cunsolas?!
Onte quije mercar ua pantemina para ninos de la famílhia i para uns ninos eiqui bezinos i dei comigo que nien boubica, sien saber l que mercar…
Que cuontas, que jogos, se you nunca joguei senó a necras i de jogos de cumputador nunca gostei!? Cun las cartas, só al burro i quedaba siempre ua roseirada d´anhos de burro, cientos deilhes a fin de cada serano…
L scanho alhá stá, i you, sien bacas para ls lhebar de buieiros, algua tuntarie hei-de eimaginar!…