15/12/10

L scanho alhá stá...

L miesmo scanho, las miesmas tanazes, l miesmo fol a abibar mimórias assoprando la cinza de l çquecimiento.
Si mie nina, tu bien bés que la bida ye dura, anque la baca te scorne, tenes que ir cun eilhas. Nun tengas miedo de l lhobo, las cuontas que oubes al serano solo se pássan de nuite i, tu buolbes de die. Bóta-las antes de l çponer de l sol para chegares inda cun die a casa…
You assi fazie mas a las bezes ambaie-me cun algo i fazie-se-me de nuite pul camino. Quando assi era, de todas las selombras se me fazien lhobos i, acagatada agarraba-me al rabo de la Cordeira que era ua baca an quien se pudie cunfiar, alrobés de la Mourisca i toca a scatrapulhar cun eilhas, por aqueilhes caminos adelantre. La burra cinza tomaba siempre la delantreira.
Se algun die bires un lhobo ne l cerrado, bai pal meio de las bacas porque eilhas te porteigerán, cumo ua beç fazírun cun un bitelo. Fazírun ua ruoda, metírun-lo ne l meio i todas cun ls cuornos a caras a fuora para qu´el nun arremetísse acontra l bitelico, até que el se fui.
Outras cuontas cuntadas, outra bida de buieiros acumpanhados de sous abós, ranas apanhadas cun canhas i un cibico de çamarra de bacalhau, xardas na ribeira de Angueira, abinturas de berano que siempre lhembrarán. Outras cuontas oubidas ne l mesmo scanho, nó de lhobos, mas de eilefantes, lhiones i lhiopardos que l fazírun medrar l eimaginairo de ninos.
L scanho stá alhá, l fol i las tanazes tamien. Que cuontas cuntarei you als mius ninos neste mundo de jogos an cumputador i an cunsolas?!
Onte quije mercar ua pantemina para ninos de la famílhia i para uns ninos eiqui bezinos i dei comigo que nien boubica, sien saber l que mercar…
Que cuontas, que jogos, se you nunca joguei senó a necras i de jogos de cumputador nunca gostei!? Cun las cartas, só al burro i quedaba siempre ua roseirada d´anhos de burro, cientos deilhes a fin de cada serano…
L scanho alhá stá, i you, sien bacas para ls lhebar de buieiros, algua tuntarie hei-de eimaginar!…




4 comentários:

leonardo antao disse...

Buonas nuites Adelaide,

Achei mui antressante este cachico de tou testo "se algun die bires un lhobo ne l cerrado, bai pal meio de las bacas porque eilhas te porteigerán, cumo ua beç fazírun cun un bitelo. Fazírun ua ruoda, metírun-lo ne l meio i todas cun ls cuornos la caras la fuora para qu´el nun arremetísse acontra l bitelico, até qu'el se fui".

Este eisemplo de coperaçon de las bacas, pa la sue sigurança i subrebibéncia, ye ua straordinária liçon para nós ls houmanos i ua proba de que l sfuorço eisolado de cada un de nós ye quaije siempre fraco i ineficaç, mas se coperarmos i mos ounirmos, quedaremos marabilhados cula grandura de la fuorça i la sue eficácea.

Bamos fazer cumo las bacas, coperar, i defendermos-emos de todos ls ataques de ls lhobos.

Beisraços ou Beijraços (cumo diç un miu amigo mirandés),
Leonardo

Adelaide Monteiro disse...

Ye bien berdade Leonardo, l mundo de ls animales dá-mos muitos eisemplos, assi nós ls sígamos...

Beisico,

delaide

Ana disse...

Buonas tardes, Adelaide.

Ua eideia de prenda para todos ls ninos de l mundo, pequeinhos ou grandes: lhibros ! i por bezes alguns (até bastantes, acho) cun eilustraçones que até parece que aquel ou aqueilha que las zenhou, pintou, ambentou, eimaginou, sonhou... las fui ancuntrar ne l cielo !
Melhores prendas que essas... ye defícele ancuntrar !

Un abraço

Adelaide Monteiro disse...

Si Ana, lhibros si siempre. You arrefiro-me a un sien fin de cousas que hai, que cumo stou zatualizada por tener filhos homes i inda nun tener nietos, nien sei para que son i l que son...
Lhibricos si merquei para ber se ls ninospúxan pula criatibidade que l stá andrento.

Beisicos,

Delaide