Yá nun hai respeito nanhun

Yá nun hai bergonha nanhua, un home ten que oubir cousas que ye de boziar las cielos, puis nien l diabo le passaba pula cabeça dezir-las.

Mas hai giente nesta tierra, neste cántico al pie de al mar que las dízen, i nós tenemos que las oubir, mas nun me pídan para quedar calhado. I l mais deilhes dében cuidar que ls outros son todos boubos, que son giente que nun ten la mesma matéria na cabeça queilhes, dében pensar que na cabeça de ls outros, hai farelos.

Dízen cousas cumo estas “augas passadas nun móben molinos”, a puis nó, mas fui nessas augas que pássorun i que molírun muita farina que eilhes anchírun l bandulho, que éran eilhes ls molineiros, que éran eilhes que fazíen i tirában las maquilas, i fui culas maquilas que anrricórun que fazírun las sus fertunas i agora las scóden an oufexores. Agora de l sou galhineiro, alhá bien alto, porque alguns yá deixórun de ser, cántan de galho, alhebántan la crista, fanfarrones, arrodeados de ls sous filhos, parientes, achegado i amigos, todos gobernando-se ou bien gobernados, i bótan-se a gastar las taludas, balientes reformas i lúcaros.

Porquei nanhun deilhes ben a dezir que nun quier mais las balintes reformas, que yá que ganhou muito dantes agora quier ganhar pouco para assi haber eigualdade.

Mas hai que dezir que l “que alhá bai alhá bai”, que “mos anbergonhamos de la pobreza”, que andámos cul coraçon apertadico de duolo i cunstarnecido. Que guapo ye esta falhaçada (falatório), esta perlhança, para ber s’un se squece queilhes stubírun siempre arrotando de ls muitos almuorços, jantaradas i cenas, a custa de quien siempre biu die apuis die, las cousas siempre indo para pior.

Agora yá a pensar ne ls dies de manhana, hai que botar, zde l strado (palanque) de l poder, adonde stubírun siempre palabras mansas para ber se nun l pérden, cumo se ls mais necitados nun ls conhecíssen, nun sabisse quien son, cumo se ls necitados nun sabissen queilhes stubírun siempre alantre de ls çtinos de l nuosso paiç i de l nuosso pobo, cumo se nós nun sabissemos queilhes ye que son ls respunsables de haber tanta giente na i a camino de la probreza, cumo s’eilhes nun fusse respunsables de las ordes i diretizes que lhebórun a tanta buona giente que nunca fizo mal a naide, a hoije tener que stender la mano, porque nunca houbo la preocupaçon dua justa çtribiuçon

Agora, hai que l paiç stá de pantanas, que hai que fazer algue, que Dius mos acuda!

Muitos, quando líren esta crónica, talbeç dígan que Foustino alhebantou-se mal çpuosto, talbeç, mas quien nun queda mal çpuosto, mais bos digo, you até drumo pouco i mal, mas feliçmente até nun son ls porblemas pessoales i familiares que me córtan l suonho, ye mais l’eipocrezie que m’arrodeia daqueilhes que ténen al sou çpor ls cadeirones de l poder, las pantalhas de la telbison, i las cornetas de la rádio, ls que me l tíran l assossego.

Çculpai l miu zabafo, mas un cunseilho para todos aqueilhes que síten l mesmo que you, botai fuora essa rábia que bai andentro cun reglas i eiducaçon, sien ferir naide, mas yá queilhes énchen la boca de democracie, ousai-la bós tamien para zmascar i cultibar, an special aqueilhes que son bítimas

Porque sabeis, esses de quien you falo, i todos antendistes quien son, stan cun miedo que se le acabe la mama.

Porque un probe até cun caldo passa, melhor, nun fui esso que só tubo, siempre?