03/12/10

Sien squecer Nuossa Senhora de Fátima !



Ampecei a ler ls testicos de l senhor porsor doutor Adriano Moreira que cada un puode ler se fur a ber l que fui puosto an linha para apersentar la dita biblioteca que hoije ten l sou nome an Bergáncia i cuntino a pensar la mesma cousa que yá cheguei a dezir aqui. Mas que un se ria tamien cumo debe de ser porque parece-me a mi que nun somos assi tan angénuos ou stúpidos… a nun ser que eimaginemos que inda stéiamos ne l ampeço de l seclo atrasado, 1917 por eisemplo, nesses anhos an que la taxa de analfabetismo era qualquiera cousa de assustador.
Diç el, l senhor porsor doutor Adriano Moreira, yá ne l fin de l segundo testo que ten por títalo « O tempo tríbulo português » ua cousa por eisemplo que, tengo la certeza, só puode deixar mais dun ancrédulo nun solo ne l paíç adonde you moro cumo tamien an Pertual :

« … de novo insistimos na urgência de organizar um verdadeiro Instituto Internacional da Língua Portuguesa. São milhões de seres humanos que a usam, sem esquecer Nossa Senhora de Fátima, que também falou em português. »

( … de nuobo ansistimos na ourgéncia de ourganizar un berdadeiro Anstituto Anternacional de la Léngua Pertuesa. Son milhones de seres houmanos que la usan, sin squecer Nuossa Senhora de Fátima, que tamien falou an pertués. )

I el claro, l senhor doutor porsor grande anteletual que Trás-ls-Montes fui a saber porque nun habie pula cierta outro senó el, el que inda nien sequiera habie nacido an 1917, staba persente (claro que tamien staba, quien ye que nun acradita ?!) juntamiente culs trés pastoricos na Coba d'Iria para dezir que si era berdade : que Nuossa Senhora falou (anton !) i que até falou an pertués !

Bá ! You só inda querie dezir, depuis destas cousas bien pouco sérias, que hai quinze dies assisti a ua série de cunferéncias que durou un die anteiro subre l centenairo de la República Pertuesa na faculdade de Lhetras de Toulouse-le-Miral que queda a poucos quilómetros de adonde moro. Stubo alhá persente para mos falar tamien de la República antre outros l deputado Fernando Rosas. Ua cousa quedou bien clara antre nós i todos stábamos de acordo quando a cierta altura tamien cheguemos a amentar nas apariçones de Fátima. Fui dito i relhembrado cun toda la rezon que esse acuntecimiento fui na realidade ourquestrado cumo reaçon por ua Eigreija cunserbadora que bie cun zagrado l sou poder deminuído i an ciertos casos abalado cul adbento de la República i la lei de separaçon de l’Eigreija i de l Stado que habie sido botada solo seis anhos antes.

Puis ! Mas esso era an 1917, bai a fazer quaije cien anhos... ua era an que habie anfeliçmente inda muita giente analfabeta an Pertual

Puis ye senhor porsor doutor Adriano Moreira...

Pula cierta que inda teneremos muitas cousas para bos dezir i esso mesmo que seia neçairo fazé-lo a miles de quilómetros de çtáncia. Nun ye cumo an 1917. Hoije até parece que nun custa nada.

9 comentários:

leonardo antao disse...

Buonas nuites Ana Marie!

Ye bien berdade qu'inda tenereis muitas cousas para mos dezir suobre l'eilustre Porsor Doutor Adriano Moreira.

Çculpai-me, mas you solo quiero fazer-bos ua pregunta, a la qual nun percisales de respunder.

- Ne l que respeita al domínio científico, cultural, ounibersitairo i houmanista, nun ye el ua de las figuras cimeiras, que ten dado probas eirrefutables d'amor a las nuossas tierras i a las nuossas gientes strasmuntanas?

Pul que del tengo lhido i oubido, ye un de ls mais doutos i eilustres nuossos cunterráneos.

Un arrochado abraço,
Leonardo

Almendra disse...
Este comentário foi removido pelo autor.
Almendra disse...

Prima Ana,
Que d'hoije nun anho stéias eiqui an pie de nós, para te desear outro anho i you que steia tamien.

Beisico
Tou primo Zé Chico

Ana disse...

Buonas nuites, Amigo Leonardo !

Dezis : « nun ye el ua de las figuras cimeiras, que ten dado probas eirrefutables d'amor a las nuossas tierras i a las nuossas gientes strasmuntanas? »

Talbeç you nun las cunheça todas essas probas de amor ou anton talbeç you tenga eisigéncias que outros nun ténen.

Li ls testos que stan an linha ne site de la biblioteca de Bergáncia i debo dezir que nun me cumbencírun.
A cierta altura (para inda dar un eisemplo)tamien amprega ua palabra para falar de l General de Gaulle cumpletamente despropositada. Diç del que era un "fanático" (un fanático de la grandeza de la França) l que ye de lamentar porque ye cumpletamente eisagerado i até anjustificado. I porque nun dixo mas ye ou relhembrou esse tan « eilustre Porsor Doutor » cumo bós dezis que esse General que se tornou depuis chefe de stado de la França lhibre fui tamien i subretodo un de mais eilustres lhibertadores contra l Alemanha nazi ?

Esto ye solo mais outro eisemplo que me lhieba a pensar mais ua beç que nien todo fui bien analizado cumo debie de ser ne l caso de A. Moreira.

I que dezir tamien quando un lei ne final dun artigo que le fui cunsagrado nestes dies ne l Diário de Coimbra que se puode ancuntrar aqui na Anternete, screbido por José Santos, cul títalo de « Adriano Moreira recebe Prémio Hispano 2010 » ua cousa que dá bien que pensar na mie oupenion :

« O ex-líder do CDS-PP evocou também, nessa tertúlia, “o carisma” de António de Oliveira Salazar e “as convicções” de Marcelo Caetano, duas personalidades que lhe são particularmente queridas e com quem privou. »

... duas personalidades que lhe são particularmente queridas, Amigo Leonardo... ??!!

Porquei ?

Porque fúrun esses dous berdadeiros fanáticos,si, giente que fizo de Pertual un de ls países mais pobres de l’Ouropa !

Mas acá staremos nós para dezir quien ye eilustre berdadeiramente i merece de l ser ou pul cuntrairo quien precisa mesmo cun 88 anhos de inda pensar dues bezes an beç dua !

Un abraço tamien

Ana Maria

Ana disse...

Primo Zé,

Bien haia i que d'hoije nun anho stéiamos todos eiqui outra beç cun salude i buona çposiçon.

Un abraço

leonardo antao disse...

Buonas nuites Ana Marie!

Cumo son guapos ls buossos comentairos i críticas. Demunstran un studo perfundo de la bida i obra de l Porsor Doutor Adriano Moreira, l que ye para mi motibo d'ourgulho.

Pareceis-me un lhibro abierto a eirradiar eideias que you aceito, porque, para ser sincero, me sinto ancapaç de rebater ó de cuntradezir.

L que conheço melhor de l nuosso eilustre Porsor ye de l ámbito de l'ansino, formaçon, palhestras i artigos scritos ne l Diário de Notícias, na mie ária de defesa i sigurança, que demunstran eilebadíssemo grau d'anteligéncia, grande coraige anteletual i física, que le grangeórun eilebado reconhecimiento público i altas cundecoraçones nacionales i strangeiras.

Custitui assi para mi ua honra, falar i studar este nuosso eilustre strasmuntano, porque esso cuntribui pa la sue balorizaçon bibencial i pessonal.

Por esso, dou-te ls mius parabienes Ana Marie, pula alta culidade de ls tous comentairos i de ls tous testos, culturalmente mui anriquecedores para nós ls amigos de l mirandês i strasmuntanos.

Un arrochado abraço,
Leonardo

Ana disse...

Bien haia, Amigo Leonardo, por todo l que dezis i tamien por dar tamien la buossa oupenion. Subre ls testos de que stamos a falar you hei-de pedir tamien l’oupenion a pessonas cun quien tengo la possebilidade de cumbersar ne l die a die, colegas mius, porsores de pertués, de stória i de filosofie.
Subre l que A. Moreira diç subre De Gaulle i la guerra na Argélia mais precisamente, quiero mostrar essa passaige i trocar eideias specialmente cun colegas de stória. Mas yá stou mais ou menos a la spera de l que me ban a dezir.
Séiamos lógicos ! Cumo ye que De Gaulle puode ser cunsiderado cumo « fanático de la grandeza de la França» se fui el precisamente, i contra l’oupenion de outros generales eilhes pul cuntrairo rigorosamente anti-andedendentistas cumo l general Salan para solo citar esse, que aceitou finalmente dar l’andependéncia a l’Argélia ?
Ye que se fusse mesmo fanático De Gaulle, cumo afirma A. Moreira, parece eibidente que tenerie adoptado las mesmas eideias, decisones i atitudes que Salan : esse si ye que puode ser cunsiderado cumo fanático...

ou outros cumo Salazar/Caetano que recusórun siempre de dar (ou de negociar serena i democraticamente) l’andependéndia a las colónias pertuesas de África oubrigando ls Pertueses a aceitar ua guerra que nun serbiu absolutamente para nada a nun ser para criar l caos i mandar para debaixo de la tierra giente einocente tanto dun lhado cumo d’ outro.

Inda hemos de falar anton.

leonardo antao disse...

Buonas nuites amiga Ana Marie:

Neste radadeiro paragrafo spones mui bien un de ls maiores erros que cometírun ls senhores de la política, que ne ls gobernórun cun Salazar/Caetano:
"recusórun siempre de dar (ó de negociar serena i democraticamente) l’andependéndia la las quelónias pertuesas de África oubrigando ls Pertueses a aceitar ua guerra que nun serbiu absolutamente para nada a nun ser para criar l caos i mandar para ambaixo d'a tierra giente einocente tanto dun lhado cumo d’ outro".

You bebi durante siete anhos, cun grande ansiadade i scitaçon, l fantasma desta guerra, zde 1968 qu'abraçei la carreira de las armas, pul que muitas bezes me anterroguei se merecian algun respeito ls políticos que nessa época mos gobernórun.

Refletindo subre este período de la nuossa stória, fácelemente berifiquei que l Pobo de l miu Paíç balia muito, mui mais que ls senhores que l gobernában nesse período.

Esta ua de las rezones porque me preparei i apoiei ls mius camaradas de las Armas para fazermos la Reboluçon de ls Crabos ó de l 25 de Abril, cul eideal de l Decolonizar, Democretizar i Zambolber.

Nun ye esta a melhor ocasion para analisar se baliu la pena ó nun fazermos esta reboluçon, mas acradita Ana Marie, que sinto-me un grande prebilégio stórico, por tener pertencido a la geraçon de ls moços Oufeciales que decidiran fazé-la.

Mui oubrigado amiga Ana por me teneres feito abrir esta antressante páigina de l lhibro de a mie stória.

Un arrochado abraço,
Leonardo

Ana disse...

Caro Leonardo,

Todos podemos i tenemos que tener eimensa proua cul golpe de stado que cunseguírun realizar ls capitanes de Abril. Na altura tenie 13 anhos i bi las eimages que passórun an quaije todos ls países de l mundo (subretodo ls países democráticos) na telbison que teniemos an França i que era a preto i branco i quedemos cuntentíssimos. Miu pai nunca gustou de Salazar. Mais tarde adorei ber « Não ou a vã glória de mandar » de Manoel de Oliveira assi cumo « Capitães de Abril » que realizou Maria de Medeiros.

Un abraço