Cuontas de Natal 2010 - Cuncurso

La admenistraçon de l blogue Froles Mirandesas abre eiqui un cuncurso de Cuontas de Natal 2010. L rigulamento de l cuncurso ye l seguinte:



1 - Ye abierto un cuncurso de Cuontas de Natal 2010 para todos ls partecipantes i lheitores de l blogue Froles Mirandesas.
2 - La cuonta ten que ser subre un tema relacionado cul Natal [Natal / Anho Nuobo / Reis / Solstício de Eimbierno], ser oureginal, star screbida an mirandés, cunsante la Cumbençon Ourtográfica de la Lhéngua Mirandesa i sue purmeira Adenda, i nunca haber sido publicada.
3 - La cuonta ten que ser publicada:
a) ne l blogue Froles Mirandesas http://frolesmirandesas.blogspot.com até al die 9 de Janeiro de 2011, cun andicaçon de que ye ua partecipaçon neste cuncurso.
b) an qualquiera outro blogue adonde se scriba an mirandés, çque esse blogue tenga aderido al cuncurso i lo manifeste an e-mail ambiado pa la admenistraçon deste blogue; nesse causo, las cuontas seran tamien publicadas apuis ne l blogue Froles Mirandesas, mas cun andicaçon de l blogue de ourige.
Quien nun stubir an cundiçones de publicar ne l blogue, puode ambiar pa la caixa de correio eiletrónico de la admenistraçon de l blogue amadeuf@gmail.com que tratará de la sue publicaçon.
4 - La cuonta será assinada pul(a) sou/sue outor(a), seia cun nome própio, seia cun pseudónimo, debendo neste causo la pessona eidentificar-se pa la caixa de correio eiletrónico apuntada an 3.
5 - La mesma pessona puode cuncorrer cun até un mássimo de trés (3) cuontas.
6 - Apuis de ancerrado l cuncurso, será feita la scuolha de la melhor cuonta, por un modo a anunciar nessa altura an mensaige a publicar neste sítio, assi se deixando lhibardade a todo mundo de partecipar, yá que ls membros de l júri teneran de ser scolhidos antre nun partecipantes. L admenistrador de l blogue nun poderá partecipar ne l cuncurso.
7 - L prémio pa la melhor cuonta será la sue publicaçon an papel / lhibro, an modo a defenir, até al Natal de 2011.
8 - Las dúbedas ou oumissones deste rigulamento seran resolbidas pula admenistraçon de l blogue ou, se fur l causo, pul júri que benga a ser nomeado.

Amadeu Ferreira
17 de Dezembre de 2010