16/07/09

Na feira de Mogadouro



Cumo ye que naciste… ?!
Mira, un die,
you i tou pai
fumos a la feira de Mogadouro
que ye ua feira
adonde se bende de todo…
Mas mesmo de todo… !
Até garoticos pequeinhos !
I you anton dixe-le a el:
Mira,
bai a ser aqueilha garota !
Por acaso,
dixo-m’el,
tamien you staba
a pensar la mesma cousa !

Mas, á Mai,
nun berrában
esses garoticos todos
a la spera d’ancuntrar pai i mai ?

Tu sabes alhá !
Mas lhougo depuis de pagarmos,
fui cumo se fusse un milagre !
Parece que quedeste tan cuntenta
que nien sequiera te oubimos dezir
nien « ui » nien « ai » !

Nun me digas, Mai !

Carai !!
I quien quedou todo admirado
fui tamien tou pai !





11 comentários:

Adelaide Monteiro disse...

Ye ua ternura essa cuontica an poesie!
Beisico, Ana.
Adelaide

Ana disse...

Buonas nuites, Adelaide, i bien haia pulas sues palabras...
i la sue simpatie.

Tamien you gusto de ler la sue poesie...
i ls bersos de todos aqueilhes que gústan de se dedicar a esta forma de spresson...

Sien pretenson !

AF disse...

Guapo, mesmo!!!

AF

Tiégui disse...

Nun acerdito Ana ! Mie mai tamien me cuntou la mesma... diç que m'habie cumprado no "Prisunic" dende a baixo !!!

franciscobelharino disse...

Buonas tardes Ana,

Guapa cuonta i bien apersentada an bersos. An Zenízio ls garoticos mercaban-se an Mobeiros i benien an barrilas. Claro que durante muito tiempo nós acreditemos nessa stória.

Un abraço,

Francisco Domingues

faustino.antao disse...

Buonas nuites amiga Ana

Gustei de ler, eicelente, quedei a saber mais esta.

Faustino

Ana disse...

Á Thierry, i sabes que essa rede de supermercados, ls « Prisunic », cumo aquel adonde tue mai tamien cun muita eimaginaçon te cuntou que te habie comprado, chegou a cierta altura a cuntrair ua díbida einorme (Nun debe de haber feito fortuna afinal cula benda de garotos !!) i acabou por ser comprada pelo grupo propietairo de ls « Monoprix » … até hoije ?
Ora, acuntece que quando nós benimos pa la França (you, mie mai i mie armana que ye mais nuoba que you de trés anhos i que tamien fui comprada na « feira de Mogadouro » cumo tamien chegou a cuntar mie mai…), an 1966 eisatamente, habie un cantor aqui an França hoije inda bibo chamado Antoine que chegou a tener un sucesso fenomenal cula cançon que ten por títalo « Les élucubrations d’Antoine » (Las eilucubraçones de Antoine) i que ampeça assi : « Ma mère m’a dit « Antoine, fais-toi couper les cheveux… » (Mie mai dixo-me « Antonho, corta-me mas ye esse pelo… » (Na altura la grande moda pa ls rapazes era de deixar medrar l pelo.. cumo se puode ber ne l youtube cul própio cantor).
Mas l mais antressante i pensei nesso por mos falares ne ls « Prisunic », ye la redadeira quadra de la cançon que acaba assi :

« Oh, Yeah !
J'ai reçu une lettre de la Présidence
Me demandant, Antoine, vous avez du bon sens,
Comment faire pour enrichir le pays ?
Mettez la pilule en vente dans les Monoprix.
Oh, Yeeeeaaaahhhh ! »

Traduçon :
Oh, Yeah ! (spresson anglesa cumo todos sáben)
Recebi ua carta de la Presidéncia
(nota : L Presidente de la República francesa na altura
era l General de Gaulle que yá tenie 76 anhos !)
Perguntando-me, Antoine, ten bun senso,
Cumo fazer para anriquecer l paíç ?
Ponga la pílula a bender ne ls Monoprix.
Oh, Yeeeeaaaahhhh !

Ora que dezir mais… ? Puis you l que sei ye que a partir dende nunca mais mie mai aparciu cun mais ua armanica ou un armanico… Talbeç para « anriquecer » (L paíç ?) cumo dezie la cançon…
Mas ua cousa era bien cierta: Yá nun stábamos an Pertual !


Bien háiades tamien, Amadeu, Francisco i Foustino…
I acho francamente tan poético l que mos cunta Francisco ! Nunca tenie oubido essa splicaçon que dan an Zenízio als garoticos… subre la maneira cumo ampeça l mundo… !

An França, l mais corriente ye ls adultos dezíren que son las ciguonhas que trázen ls ninos dentro dun panho pindurado al bico desses grandes paixaros brancos… mas tamien que ls rapazicos nácen dentro de ls repolhos (dans les choux !) i las rapazicas dentro de las rosas (dans les roses !).

Mas palabra d’honra, a mi siempre me surprendiu i inda me surprende oubir inda hoije mie mai dezir, cumo ua cousa mui natural !, que you cumo outros fumos un die « comprados… na feira de Mogadouro ! »

I que dezir mais ?

Ana disse...

Só mais ua cousa:
quien quejir dar un mergulho nesses anhos sessenta an que muitos moços i moças querien reambentar l mundo, ide al youtube i pedi: Antoine les élucubrations.
Será que na buossa bida, nunca la oubistes essa cançon de l cantor Antoine ?
Nun acredito !

José Esteves disse...

Oula Ana, buonas tardes

A mi me dezien que me habien cunprado na feira de Sendin i you acreditaba, até que ua beç miu armano, que ye uns nuobe anhos mais bielho,ye que me dixo cumo habie sido, i anton quedei a saber la berdade. Mas eiqui l que amporta ye que stá mui bien zenhado por ti.
Fazies-te uns bersos mui guapos gustei muito parabienes, cuntinua

Beisicos

José António Esteves

Tiégui disse...

Ho ! Anton ya sei purquei a final nunca tube armanos nien armanas... al caralho al persidiente metiu als remedies aqueilhes a la benda...

Ana disse...

Buonas nuites, Amigo Jesé,

Zenhado... ou solo amentado... cumo gústan de fazer todos ls ninos que ban daprendendo l que ye l bida...
Mas podemos ber que essas feiras son siempre feiras que se realizában noutras tierras... pula cierta feiras speciales !

Un abraço, Amigo Poeta.