28/07/09

Salimiento de nuobo lhibro an Mirandés: Zenízio, 13 /08 a las 16, 30






L’ Associaçon ‘’Sol Nascente’’, cun morada an Zenízio, ten l gusto i la proua de ouganizar l Salimiento de l lhibro Nuobas Fábulas Mirandesas i cuontas sacadas de la bida, de l scritor zeniziense Faustino Antão.
L salimiento será ne l die 13 de Agosto a las 16, 30 na morada de l’ Associaçon, an Zenízio. L’apersentaçon de l lhibro será feita pul studioso, ambestigador, porsor i amigo de ls Boubielhos Dr. Amadeu Ferreira i cuntará cun la persécia de l outor Faustino Antão i de Francisco Dmingues que persidirá a la sesson.
Esta ye la purmeira beç que bai a haber l salimiento dun lhibro an Zenízio i inda porriba screbido an mirandés por un Boubielho. Este feito lhieba ls Boubielhos an giral i an particular l’Associaçon Sol Nascente a quedar chenos de proua.
Zenízio ua aldé pequeinha an tamanho mas grande ne ls feitos culs sous artesanos i pintores yá bien coincidos, passa a tener tamien un scritor que an Nuobas Fábulas Mirandesas i cuontas sacadas de la bida, que retrata la lhuita de l die a die de ls trabalhos ne l campo i las cuontas associadas a esses trabalhos.
Assi, l’ Associaçon Sol Nascente ten la honra de cumbidar todos ls Boubielhos, amigos, toda la quadrilha de l blogue frolesmirandesas, i todos ls mirandeses, a star persentes na sue casa ne l die 11 de Agosto. Este será un die mui amportante pa ls Boubielhos an giral i an particular pa l amigo i scritor Faustino Antão.

Francisco Domingues




4 comentários:

leonardo antao disse...

Buonas nuites Amigo Francisco,

Parabienes pula colaboraçon que stás a dar a la Associaçon Sol Nascente na ouganizaçon de l salimiento de l lhibro Nuobas Fábulas Mirandesas.

Ls Zenízienses de ls Ourgans Sociales de l’Associaçon Cultural i Recreatiba Nial de la Boubielha, agradeçan a Amadeu Ferreira l ampeinho na publicaçon deste lhibro que ten cuomo Autor l nuosso associado Faustino Antão.

Cuomo sabes, la Direcçon de l’Associaçon Nial de la Boubielha, anterpretando l sentimiento de ls associados decidiu, cuomo patrocínio, cumprar 60 eisemplares de la obra de Faustino Antão i 10 eisemplares de cada un de ls outros trés, de tiu José António Esteves (bersos), de Alfredo Cameirão (cuontas) e de Fonso Roixo (bersos). Ne l total 90 lhibros.

Tenemos cunciência de que este lhibro de Faustino Antão será ua buona base de dibulgaçon de l patrimonho cultural i lhénguistico eijistente i a defander, na nuossa aldé de Zenízio i noutras aldés de l Cuncelho de Miranda de l Douro, bien retratado an bários testos publicados no nuosso site Nial de la Boubielha i no Froles Mirandesas.

Cun l salimiento deste lhibro, l’Associaçon Cultural i Recreatiba Nial de la Boubielha cungratula-se i está a ber ls fruitos de l anriqueciminto cultural i lhénguistico de ls sous associados, grácias l significatibo sforço financeiro i de ouganizaçon de Cursos i Palhestras de lhéngua mirandesa, que ten feito nestes últimos 6 anhos, cun l apoio de Amadeu Ferreira de l´Associaçon de Lhéngua Mirandesa.

l’Associaçon Cultural i Recreatiba Nial de la Boubielha está cunciente que este lhibro de Faustino Antão serbirá de motibaçon para la quemunidade zeniziense cuntinuar ounida i lhigada a la cultura i lhéngua mirandesa.

Oubrigado a Faustino i a Amadeu por este amportante trabalho.

L Persidente de l’A.C.R. Nial de la Boubielha
Leonardo Fernandes Antão

adeusdado disse...

Caro Francisco
Mui bien pensado l salimiento de un lhibro de Faustino. Bai ser un grande eimbiento, i se pudir gustarie de stra alhá. Bamos a ber se las cousas se componan.Seia cumo fur, stamos todos de parabienes i percipalmiente Faustino
Un abraço mirandés
Válter

Fir disse...

Buonas tardes, amigo Francisco.
Obrigado por nos dar esta notícia.
Muitos parabéns, amigo Faustino.
Eu não poderei estar lá, mas quero um livro quando o Faustino regressar a Lisboa. Votos de sucesso para o evento.
Um abraço.

Almendra disse...

Para la Associaçon ls parabienes i para Faustino un abraço i un bien haias por haberes tornado la nuossa lhéngua mais rica.
Quedei mesmo cuntento!

Almendra