31/07/09

Salimiento de lhibros: 1 de agosto, a las 12 h 00, ne l Festibal Antercéltico de Sendin





Manhana, die 1 de agosto, a las 12 h 00, ne l Festibal Antercéltico de Sendin, nas anstalaçones de la Dega Copratiba, bai a ser l salimiento de quatro nuobos lhibros an mirandés i que cuntará cula perséncia de ls sous outores:

- Alfredo Cameirão , Tortulhas, Cuontas deste Mundo i de l Outro;
- Faustino Antão, Nuobas Fábulas Mirandesas i Cuontas Sacadas de la Bida;
- José António Esteves, Ls Bersos de Jantonho;
- Fonso Roixo, L Purmeiro Lhibro de Bersos.


Estes lhibros son ls purmeiros dua nuoba coleçon AN MIRANDÉS, ampeçada pula eiditora ZÉFIRO. A estes se seguiran outros.

Cuido que se trata dun grande cuntributo pa la lhiteratura mirandesa que, assi, als poucos i cun nuobos outores, bai lhebantando la sue casa.

Quien pudir, nun deixe de aparecer. I que todos fágan algo por dibulgar la lhiteratura mirandesa i fágan l mais que podíren para que estas eidiçones séian un éisito puis solo assi ye possible cuntinar a publicar nuobos outores.




7 comentários:

franciscobelharino disse...

Buonos dies Amadeu,

Cun muita pena, mas nun bou a star persente, yá que la bida inda me oubriga a quedar mais uns dies an Lisboua. Deseio que todo cuorra bien i puodes cuntar cun la mie ajuda pa la dibulgaçon destas obras. Deixo un abraço bien arrochado pa ls quatro.

Francisco Domingues

Tiégui disse...

mui fixe ! Inda se me lembra l'anhe passado quando Nicolas me dixo: "Nos equi, sale quatro llibros tolos dies !"

Afinal pr'ende tamien bai a ser eigual :)

Isilda disse...

Buonas tardes amigo Amadeu,

Tamien cun muita pena mie nun bou a star persente, inda stou por tierras de Bila Nuoba de Gaia mas pormeto que starei ne l die 22 de Agosto, na Trindade.
Ba, que todo bos baia bien alhá por Sendim e fazei la fiesta tamien por nós.

Saludos
Isilda

Ana disse...

Buonas tardes, Amadeu, yá zde Sendin...

Starei alhá cun muito gusto.

Ana

leonardo antao disse...

Buonas nuites Amigo Amadeu:

Nun puodo star persente, cun muita pena mie.

Parabienes pul ebento i las maiores felicidades para todos.

Ls associados de l’Associaçon Cultural i Recreatiba Nial de la Boubielha, agradeçan a Amadeu Ferreira l ampeinho na publicaçon de l lhibro que ten cuomo Autor l nuosso associado Faustino Antão.

Cuomo sabes l Nial de la Boubielha, decidiu, cuomo patrocínio, cumprar 60 eisemplares de la obra de Faustino Antão i 10 eisemplares de cada un de ls outros trés, de tiu José António Esteves (bersos), de Alfredo Cameirão (cuontas) e de Fonso Roixo (bersos).

Anté l die 13 de Agosto an Zenízio, cun un arrochado abraço de,
Leonardo Antão

Adelaide Monteiro disse...

Buonas nuites amigos/
De la Speciosa mui felic por haber coincido mais uns poucos de amigos de la quadrilha: Ana, Tortulhas, Cangueira i Almendra.Felic tamien porque fui un die einesquecible para mie por todo l que pude bibir: l lhancamiento, l houmenaige a tiu Lérias, la méisica fantastica desse fantastico festibal.
Mui agradecida a Almendra por me haber arranjado l pie zmanchado i a Marilia po l bien que me recebiu.
Sabes Almendra, you sou mui beiladeira i l pie inda quedou buono para you beilar un cachico i fui para casa a guiar sien deficuldade.L nacer del sol al chegar, ouserbado zde l Naso, apuis daquel die, inda me pareciu mais guapo...
Se nun mos birmos antes, ate die 22. Eisilda, stou cuntenta porque bàs.
Muitos beisicos a todos, queridos amigos,
Delaide

Adelaide Monteiro disse...

(cuntinuacon)Mui cuntenta por haber coincido la familia de Cangueiro i la alantejana mais mirandesa que hai, tie de Faustino. Tiu Jantonho gostei de bos coincer, joben de l miu tiempo i toca a screbir siempre.
Delaide