02/07/09

Melodie de mi




You sou brisa, sou bendabal
Nubrina, tempestade
You sou ampeço, sou fin
L meio nun ye para mi
Sou de stremos, na berdade.
Pertenço al mundo i a mi
I solo me dou se you quiero
Sin posse i solo assi
Sin cadenas, sin atilhos
Porque la liberdade benero.
Tengo la fuorça de la nortada
La fragilidade de la maresie
L rubor de la rosa ancarnada
De açucenas la candura
De l malmequer, la fantasie.
Por mui que la mente
Me diga que nó
Oubo la boç de l coraçon
I depuis gero un cunflito;
L coraçon queda aflito
You ampongo-me, you refilo
Alto alhá, you mando eiqui
You que sou coraçon i mente
You que sou giente
I ne l to, you decido



3 comentários:

faustino.antao disse...

Guapo, mui guapo amiga Adelaide

Apuis de ler quedei an bun cacho an siléncio, doutro modo nun puodie ser, assi saborei até la fin.

Parabienes

Beisicos
Faustino

Isilda disse...

Buonos dies Adelaide!

Sin dubida amiga, naide puode comandar la nuossa bida, ser nuosso duonho, nós somos duonhos de nós propios.
Bien guapo esse tou poema, cumo tantos outros!!

Beisicos
Isilda

franciscobelharino disse...

Buonos dies Delaide,

Parabienes por tan guapo poema.

Un abraço,

Francisco