26/07/09

Ls Boubielhos an Fiesta
















Die 13 d’ Agosto bai a ser die de fiesta pa ls boubielhos que stéian nesse die ne l sou nial d’ourige (Zenízio). Zenízio ye decierto ua de las ralas aldés que ten dues Associaçones Culturales. Ua cun morada na Zenízio ‘’Associação Cultural e Recreativa Sol Nascente’’ criada ne ls ampeços de ls anhos uitenta de l seclo atrasado i que ten zde la sue fundaçon zambolbido un trabalho an çfesa de la cultura i de las tradiçones. Assi, ten ourganizado torneios de jogos tradicionales, corridas, caminadas a la fuonte de las Spadanhas seguidas de merenda, matáncia de l cochino, jogos de bola solteiros/casados, passeios de bicicleta anté l Naso seguido d’almuorço ne ls cabanhales i cena de l associado. L’Associaçon tubo inda l mérito de criar l Museu Lhagar adonde ajunta muitos outensilhos i alfaias agrícolas. A la par destas atebidades zambuolbe un salutar cumbíbio ne l sou die a die antre ls más nuobos i menos nuobos que se ban ancuntrando i ténen assi ouportunidade de partilhar saberes i de falar la nuossa lhéngua.

‘’L’Associaçon Cultural i Recriatiba Nial de la Boubielha’’ cun morada an Corroios que tubo l sou ampeço ne l die 1 de Nobembre de 1975, cul sou purmeiro magosto. Zde esse die cuntinou a ouganizar magostos to ls anhos, apuis jogos tradecionales i merendas ne l die purmeiro de Maio i missa seguida d’almuorço ne l die dous de Febreiro. Inda que tenga yá bien anhos solo apuis de l’ aprobaçon pula Assemblé de la República de l mirandés cumo lhéngua oufecial de Pertual se pensou lhegalizá-la na nuossa lhéngua. Assi, ne l die 13 de Agosto de 1999, ne l cartório notarial de Miranda de l Douro fui feita scritura pública de custituiçon de l Nial de la Boubielha na nuossa lhéngua.
Tal cumo l’Associaçon Sol Nascente, tamien l’Associaçon Nial de la Boubielha ten çfendido i pormobido ls jogos tradicionales, l cumbíbio i la çfesa i pormoçon de l mirandés falado i screbido. Pa comemorar ls dieç anhos oufeciales de l Nial de la Boubielha l sou persidente fizo l zafio al persidente de l’Associaçon Sol Nascente que lhougo aceitou i an parcerie stabelecírun l porgrama pa esse die.

Assi, a las 14.30h na eigreija matriç de Zenízio bai haber missa na nuossa lhéngua, dita pul cunterráneo i amigo cura Basileu Pires. Apuis pa ls que quérgan zanferrujar las piernas i téngan buona puntarie hai juogos de l fito. A la nuite ls associados de dambas las dues Associaçones que téngan las cuontas an die i antegrado na cena de l associado de l’ Associaçon Sol Nascente ténen la cena cun cochino brabo.
Quien nun seia associado ou nun tenga las cuontas an die inda puode fazé-lo anté esse die i, cumo la porpina ye tan pouca todo mundo se debie fazer associado de dambas las Associaçones.
Este será un die stórico adonde ls boubielhos a bibir an Zenízio i nas çfrentes partes de Pertual i de l Mundo se puoden ancuntrar i partilhar bários momientos (rezando, jogando, cumbersando, relhembrando tiempos i stórias quemuns i cenando). Todo será feito nun sprito abierto i de sano cumbíbio que tenerá cumo oujetibo l refuorço i la sana camaradaige antre ls associados de dambas las Associaçones.
Se yá hai uns anhos que nun passas uns dies na Zenízio, astanho nun puodes perder esta ouportunidade stórica de fiesta pa te ancuntrares cun muitos amigos que scalhar yá nun bes hai muito tiempo. Nun faltes.

Francisco Domingues




2 comentários:

Isilda disse...

Buonos dies amigo Franciscobelharino!

Antes de mais quiero dar ls parabienes a todos ls homes i mulhieres de Zenísio, que tan bien ten zambolbido la sue Associaçon i sabido mantener i dibulgar las sues tradiçones.Ye ralo hoije an die alguien se antressar pulas sues aldés, pulas sues gientes i mantener bibas las tradiçones dun pobo.
I digo-bos mais, solo nun bos besito porque esse die stou un pouco lhoinge.
Ben hában por nun deixar squecer aqueilho que son las raizes de todos nós.
Saludos a todos.
Isilda

leonardo antao disse...

Buonas nuites Amigo Francisco,

Parabienes por esta síntese stórica de las dues associaçones de Zenízio i puls guapos retraticos de cumbíbios anteriores.

Spero que seia un amportante cumbíbio de las familias zenízienses, para criar ua mais fuorte lhigaçon antre las que bibimos eiqui por la grande Lisboua i las que biban na aldé.

Spero, an special, que sirba para tornar inda mais fuorte la amisade antre ls associados dambas las Associaçones i que mos ajuda a cuntinuar a cantar por muitos anhos “Biba Zenízio, tierra sien par, yes un cantico lindo, lindo d’ancantar”.
Leonardo Antão