06/07/09

Eilebada graticon para José Ruy i Amadeu Ferreira



La apersentaçon de Ls Lusíadas i de la Stória dua Lhéngua i dun Pobo, ne l die dous de Júlio, na Fundaçon Mário Soares an Lisboua, cun la perséncia de cerca de 150 personas, quaije todas mirandesas, fui, para mi, la maior houmenaige a todos nós ls falantes de la lhéngua mirandesa.

Muito, muito oubrigado Amigo Amadeu Ferreira, i muito, muito oubrigado José Ruy, por estes dous eicelentes i ancantadores trabalhos an banda zenhada, que son la maior proba de la buossa einimaginable dedicaçon, cun amor i paixon, pula lhéngua mirandesa.

Ls Lusíadas i la Stória dua Lhéngua i dun Pobo, ban ser, para mi, ls mais baliosos lhibros para mantener biba i para dibulgaçon de la lhéngua mirandesa, para melhorar l coincimento de la stória de l mirandés i la formaçon lhenguística de muitos de ls naturales i deçandientes de las tierras mirandesas.

Cun este strourdinário trabalho an banda zenhada, amigos José Ruy i Amadeu Ferreira cuntribuistes mui significatibamente pal zambolbimento de l mirandés i pa l prestígio de la nuossa querida lhéngua mirandesa i, por esso, sodes merecedores de la mais eilhebada gratidon, stima i cunsideraçon de todos ls mirandeses.

Cuntinai a dar boç a la houmilde giente mirandesa.

Leonardo Antão


Sem comentários: