04/07/09

Adonde stás, miu bércio?




Camino rue arriba

Rue abaixo
De l miu bérçio
De casas sien ancaliar
Mas miu bérçio, nun te conheço
Cun tues casas
Adonde nun se puode entrar.
Bolórun-te ls páixaros
Medra yerba nas preças de casa
Médran ourtigas a la entrada
Médran aranheiras na sala
Ls ferroilhos yá nun se ábren
La aldaba stá anferrujada.
Médran silbeirones i tomilhos
Adonde bou a caminar
Mas miu bérçio, adonde stás
Se you yá nun acho caminos
I l ribeiro stá a secar?
Quiero chegar a las stebas
Para cun eilhas me banhar
Mas ls touçones
Adonde me perdo
Son tan grandes,
tan medonhos
Son papones
Que nun me déixan passar.
Quiero chegar a la gente
A la pouca que bai habendo
Mas miu bérçio
La gente stá tan çfrente
Que a las bezes nun la reconheço.
Miu bércio
Mie aldé,
Miu alqueire, miu suco
Mie cama de fierro
Xaragon de palhas,
Adonde drumiemos;
Cozina cun scanhos
I prato redondo,
D'adonde todos quemiemos.

Adonde stás miu bérçio?
Adonde stou you?



1 comentário:

franciscobelharino disse...

Buonos dies Delaide,

Que guapos bersos screbiste subre l bércio que todos nós tubimos i, cumo dizes ye assi an todos las aldés qu' el stá. Cheno de aranheiras, de silbeirones, de touçones. Mas nun puodemos perder la spráncia de que inda un die bai a ser çfrente para melhor.

Un abraço,

Francisco