20/07/09

Nuite de lhunar







Sentada na mie baranda,
Beio las óndias, beio l mar,
Parece mesmo que ye die
Mas ye ua nuite de lhunar.
I las gaibotas an bando
Junto a l’auga ban pousar
Squécen las pessonas na rue
Quédan na arena a namorar.
Cerro ls uolhos i bolo lhoinge
Ambalada pul mar
Ls mius pensamientos num páran
Lhieban-me para outro lhugar.
Bien lhoinge deilhi
Adonde nin eisiste l mar
Oubo ls grilhos que cántan
An tan guapa nuite de lhunar.
Yá nun stou mais na cidade,
Stou lhoinge, na mie aldé
Uolho l cielo beio las streilhas
Ye nuite de Lhuna chena.
Fui esta magie de la nuite
Que me lhebou para un tiempo lhoinge
Adonde nunca tenie bisto l mar
Solo habie de semelhante
Tan guapa nuite de lhunar!


3 comentários:

Adelaide Monteiro disse...

Brabo, brabo!...
Bien haias, Eisilda.
beisico

Almendra disse...

Guapo!Guapo!Guapo!...
Bs
Almendra

franciscobelharino disse...

Buonas tardes Eisilda,
Gostei muito i parabienes por tan guapos bersos.

Un abraço,
Francisco