14/07/09

L Feirante



Datrás, quando un tenie que cumprar cousas, tenie que ser nas feiras, que doutra maneira nun s'ancuntraba nada. Nun habie adonde cumprar. Alhá teniemos que ir a las feiras quando percisábamos de cumprar algua cousa, ó teniemos pra bander las bacas, ls bitelos, ó ls cochinos, las burras, ó ls machos. Esses solo d'anho a anho ye que se cumprában ó bandien. Que you me lhembre, solo habie trés ó quatro feiras: era la feira nuoba an Miranda, ls grades de Mogadouro, ls grades de Sendin, nun sei se ne l Naso tamien habie la feira de ls burros yá nun me lhembra mui bien. Fuora essas feiras, esse ganado solo ls ciganos ye que negociában. Quien l tenie pra bander ó percisaba de cumprar tenie que ser als ciganos que se cumpraba ó bandie. Las bacas i las canhonas. Para essas stában las feiras.
Ua beç miu pai percisaba de cumprar uas quantas cabeças i fui a uas quantas feiras. Fui a Mogadouro i nada, nun comprou nada porque stában caras i era loinge pa las traier, tamien fui a Sanhoane, a Algoso, a Caçareilhos, a la d'alhá de Palaçuolo, a Sendin, a Dues Eigreijas, a Malhadas, i parece-me que anté al Naso el fui . I nada, nun fui capaç de comprar nada. Nessa altura yá you era un frangalhote, i dixe-le un die a miu pai:
- Pai quereis que baia you a la feira a cumprar l que bos fai falta? Ides a ber cumo compro todo i bien barato.
Ampeçórun-se todos a rir?
- Quei antendes tu de cria, sou burro?!
Mas you anteimei, i dixe
- compro, compro deixai-me ir i bós ides a ber.
Cumo era nua altura de muito serbiço, i miu pai nun tenie bagar dixo.:
- Pronto, anton bás tu, mas ten cuidado nun te deixes anganhar, que tenemos pouco denheiro.
- Deixai cumigo yá me sei zanrrascar, dixe you.
I assi fui. Chegada la feira, besti mies calças de pana nuobas, ua camisa de tebé, que habie custado trinta i cinco malreis, cumprou-la mie mai a tie Cunstáncia de Fuonte Aldé, tamien çapatos nuobos i ua jiqueta nuoba tamien de pana. Parecie un figuron.

Miu pai dou-me l denheiro. Cien scudos.
- Toma, dixo, compras de todo un pouco, nun deixes perder l denheiro, ó haber se l jogas na burmelhina.
- Deixai nun bos ides a arrepander, dixe you.
Fui-me pa la feira dei uas buoltas i cumprei de todo l que precisábamos.
Ó seia cien cabeças al todo, i gastei ls cien scudos (1oo scudos ó 100 Euros).

Cumprei Bacas a cinco scudos ó cinco Euros
Cumprei Canhonas a mei ston ó cinco centimos
I cumprei Cabras a un scudo ó un Euro

Agora l que quiero que me dígades ye quantas bacas, quantas canhonas i quantas cabras you cumprei. Pus a mi yá nun me lhembra.
Pronto, toca a fazer cuntas i fazei-me anton l fabor de me dezier las cabeças que you cumprei. Nun puode passar de ls cien scudos nien de las cien cabeças. Pronto ,se nun soubirdes ó nun bos quejirdes anquemodar culas mies bacas i las mies canhonas i cabras, nun passa nada, heide arranjar maneira de me lhembrar i depuis digo-bos you a bós cumo you fiç i l que you cumprei.
Pronto, anton até outra beç i toca a fazer cuntas.


José António Esteves




3 comentários:

Adelaide Monteiro disse...

Amigo Stebes,
La feira de l Naso, de ls burros, ye no die seis de Setembro.
beisico

José Esteves disse...

Bá l feirante bai-bos anton a dezier las bacas i las canhonas i las cabras quel cumprou culs cien scudos que l dou sou pai. Fui assi

Cumprei 19 bacas a cinco scudos
son 95 scudos.
cumprei 80 canhonas a 5 centabos
son 4 scudos
I cumprei 1 cabra a i scudo
faç i scudo

agora la soma 19+80+1=100

la soma an denheiro 95+4+1=100

Bedes cumo todo bate cierto. Pronto agora yá sabeis, çculpai la maçada. I até outra beç. Un abraço.

José António Esteves

faustino.antao disse...

Amigo José Esteves

Fien feita essa cunta i bien cuntada.

Alhá pa l percípio de l més que ben ides a cuntar-me-la an pessona porque bou a passar por ende.

Un abraço
Faustino