09/07/09

De açucena a rosa burmeilha



Era flor de çucena, branca i pura
Puolos amarielhos i lhebes
Néctar doce eimaculado
Adonde l abelhon sou amado
Tiraba l sou miel
I de tan apaixonado
Le daba beisos
I la fazie sentir
Ua princesa
Cun tal singelesa
Que se sentie cumo fura
L´única flor de ls deseios.
Un die oulhou pa l lhado
I l zabergonhado, l abelhon
Staba anrebulhado
Ne l puolo doutra flor.
La probre çucena
An zeiluzon i a tritar
Dou-le un ambarron
L boubo de la abelhon
I puso-la a marchar.
Guapa cumo era, la linda çucena
Ancuntrou nun die de Primabera
Un beisa flor
De tan quelorido que era
I de bolar tan lhebe
Abriu lhougo an flor
I apaixonou-se debrebe.
Fúrun beisos tantos,
Cun l bico cumprido
Que nien sabe quantos
Quedando l sou néctar
Lhougo cunsemido
Cumo cunsemida
Quando biu
l sou amor
Cun outras flores repartido.
Nó, assi nó,
Dixo la flor anraibada,
Bos ides a ber
L que ye capaç de fazer
Ua flor anganhada.
Anxertou-se de roseira
I na Primabera soalheira
Abriu ua rosa burmeilha
Que relhamposa i feiteceira
A naide se abrie i
Bibie solo para eillha;
Rie-se para todos,
l beisa flor, l moscardo, l abelhon,
Piçcaba-l l uolho
Amostraba paixon
Mas a ningun querie.
I assi, la flor çpeitada
Siempre perfumada
Ningun la tenie
i se la cheiraba,
era porque la respeitaba.
Ls stames solo amostraba,
A quien i quando eilha querie.



3 comentários:

ACangueiro disse...

Bersos calientes i de paixon
Mostran la calor i a ternura
de l coraçon!

Saludo!

ACangueiro

Félç disse...

Buonas tardes,
La bida ye compuosta de ilusones, sperancia, amor, paixones, contratiempos i desilusones.
Gustamos de amostrar l que de buono tenemos,tentamos sconder que que tenemos de menos buono, mas para bibir hai que misturar estas cousas todas i ye un don saber çtinguilas.
You pur la mie parte, cun la cabeça caliente digo i fago cousas que mais tarde me arrependo.
Gustei de l poema,
parabienes
Cumprimentos
Félç

Adelaide Monteiro disse...

Bien pudie ser ua stória de berdade ora si, Felç?
Hai porende muitos abelhónes, beisa flor, çucenas i rosas... mas nien todo l que parece ye! Hai çucenas que nun són çucenas, rosas que nun són rosas, abelhónes que nun són abelhónes, etc. etc.Nien todo l que relhuç ye ouro.
Ls poetas són mui anfingidores!
Mas la bida ye mesmo cumo tu dizes.
bs
Adelaide

Çculpa Abelhón de Benpuosta, mas este nun sós tu!