07/11/09

Tornar al Praino

Ua xara, un touçón,
ua peinha, un fincón,
ua huorta, ua lheira,
ua tierra na praineira
cacho de l tou mundo
barriga que te pariu
i fizo de arrolhón
tirou-te l friu,
dou-te eimoçón.
Crécen las prumas i sales a bolar caras al sol
suobre l mar quédan rastreiras bien marcadas
na frescura d’ua nubre,
nas óndias alborotadas.
Cien buoltas deste al mundo antes de tornar
un farrapo remendado
salagre cume un guiço
çfalhecido
mirar mortiço
dzanimado.
Sobran códeas de lhénguas porfelhadas,
fáltan las falas de la fala:
pura einergie para pilhas bien cargadas.

5 comentários:

Adelaide Monteiro disse...

Que guapo sfregante poétco, amigo!
parabienes.
Un chi.

Adelaide Monteiro disse...
Este comentário foi removido pelo autor.
faustino.antao disse...

Dius mos deia buonos dies amigo

-Mui guapo
-You gusto de ber las cousas ditas assi.
-Parabienes

Un abraço arrochado

ACangueiro disse...

Ls oulores, ls retratos, auga un sucos de pumenteiros i frajoneiras na alfa de fin de tarde, arrastran-se rastadeiras de selombras que salagre nun quede i óndias alborotadas se amansen i remansen no praino de nino.

Guapo!!! Biajei...

Bien-haia,

ACangueiro

Abelhon disse...

Quando un anda meio ampecadado cun falta dun serano para anciscar las manos nun assador de castanhas ...
queda cume a bezes senti a miu pai quando de l Naso miraba la sue Çpeciosa: tan cerca i tan loinge.

... á que si Delaide?
beiso grande.

Faustino, ACangueiro: hai ourrietas no Praino que son ounibersos de eimoçones. Un abraço arrochado.