25/11/09

You fui mulhier






You fui siléncio!...
Por lhargos dies, lhargos anhos,
you fui siléncio:
Angulhido,
aguemitado,
medrado.
You fui perdon,
you fui miedo!...
Por lhargos dies, lhargos anhos,
you fui perdon cunsentido,
miedo multeplicado
de iansultos, delores,
houmilhaçon.

Cumo caldo angulhi mauga,
l´ampoténcia cun auga,
le delor cun lhágrimas,
parti speilhos, scadarcei suonhos,
calhei palabras, sequei géstios
apelidei tiques,
custruí diques...

Acabei cun l siléncio,
a arrastrar-me alhebantei-me, ...
reagi amedruncada.
Apuis,
fiç-me la mulhier coraige
de la selombra de ls mius dies,

páixaro smenuçado na punta de la chibata,
que andefeso se tomba na friaige.
I,
als mius uolhos
la nuite boraç deciu
an pleno die
i,
ls mius uolhos fúrun nuite,...
na paç de la nuite!...




Hoije, l 25 de Nobembro, ye l Die Anternacional Contra la Bioléncia Contra las Mulhieres.
Muorren an Pertual por anho, an média, 40 mulhieres bítimas dessa bioléncia.
Mais un die Anternacional que ambergonha.


4 comentários:

Abelhon disse...

Guapo, guapo.
Un chi grande

AF disse...

L poema: guapo.
La denúncia: siempre neçaira.
La rebuolta: ua eisigença.
La situacion: ua bergonha sin fin.

bs.
Amadeu

Adelaide Monteiro disse...

un chi als dous, Boeiro i Amadeu i bien Haiades.

adeusdado disse...

Oulá Adelaide
Nunca ye demais denunciar estas i todas las situaçones siempre que ls dreitos l home seian biolados. La biolência doméstica ye ua dessas, que urge denunciar
Bjo
Válter