10/11/09

Haberá cousa que mais cunta ?

Ancuntremos-mos ne l semitério
mas sien you saber quien era.
Puso-se a falar
i a dezir-me cousas
cumo se fusse
para eilha
ua pessona cunhecida
zde toda la bida…

Falou-me lhibremente
mesmo sien you ansistir…
Ampeçou por me dezir :

- Yá fazie trinta anhos
que you andaba an França.
Inda era rapaza nuoba
quando you fui para alhá…

Mas tornei para acá…
i cheguei-me a casar
Deixei-me acá star !

Ls prumeiros tiempos
assi i todo custórun !
Houbo cousas que stranhei…
Mas cul tiempo m’afazerei…

I para dezir la berdade :
ye porque yá stou casada
senó…

Era bien capaç de scapar
Nun habie muito de tardar !
Mas agora stou casada !
Haberá cousa que mais cunta ?

- Nó !
Nun hai cousa que mais cunta !

I fui essa la mie respuosta
que you le dei a essa tie
essa tie que nun cunhecie.



Sem comentários: