17/11/09

PARABIENES TIE EINÉS



Parabienes hoije t´oufreço
Nesta data tan querida
Muitas, muitas felicidades
I muitos anhos de bida.

Mais un anho passado
Mais un aniberssairo chegou
I para te dar ls parabienes
You inda porqui stou.

La bida ten destas cousa
Ye ua ruoda a ruodar
Anté yá t´arrumou un home
Para cuntigo se casar.

Pus la bida assi deste modo
Anté yá ten outro brilho
Que para mais felicidade
Anté yá te dou un filho.

Pus quando eilha ye bibida a dous
Ye nessas cousas que bai a dar
Mas tamien ye un modo
De l mundo nun s´acabar.

Pus assi cun esse filho
La bida yá ten outro jeito
I yá naide puode dezier
Que l trabalho nun fui bien feito.

La bida ye isso miesmo
Que naide me diga que nó?
Stou-le agrasdecido a la tue bida
Que yá fizo de mi un abó.

La bida ten altos i baixos
Que nós tenemos que passar
I tamien cun cousas buonas
Tenemos l dreito de sonhar.

You sonho todas las nuites
Para ti cua bida de rosas
Que las goses todos ls dies
Siempre frescas i fermosas.

Muitas, muitas felicidades
Que todo te seia dibertido
I muita, muita alegrie
Para juntar a la que tenes tenido.

Que todo te seia quelor de rosa
Tal qual cumo you la pintei
Porque se tu fures muito feliç
Seguro que tamien you l serei.

Pido-le a Dius muita salude
Para tu te puoderes dibertir?
Neste die de parabienes
I ne ls outros que benen a seguir.

Pus ls carreirones de la bida
Que nien siempre son muito moles
Mas se me deixaren scuolher
Scuolho un carreiron de froles.

Scuolho un carreiron de froles
Para tu puoderes passar
Renobando siempre las froles
Anquanto Dius me deixar.

Pus trinta rosas floridas
Fazen un jardun de belheza
Un arranjo i tanto
De ambelheza qualquier mesa.

Se nun fur muito pedir
Pido you hoije para ti
Pido a Dius i nuossa senhora
Que te deixe star siempre assi.

Que te deixe star siempre assi
Un tan guapo ramico
An die de parabienes
Deixo-te you un beisico

Un beisico bien grande
Para ti mie querida
Que steia siempre cuntigo
Todos ls dies de tue bida.

José António Esteves

Un beisico grande i parabienes




3 comentários:

Inês disse...

Só posso agradecer esta bonita surpresa.
Fiquei sem palavras! Espero, meu querido sogro, que ainda possamos festejar muitos aniversários, meus e seus, de forma a podermos ver o nosso João crescer.
Um grande beijinho e muito obrigada.

P.S. - Peço desculpa não escrever em mirandês mas, como sabe, percebo quase tudo mas não digo quase nada :)

AF disse...

Oulá Einés,

Que surpresa agradable, que you nun sabie. Muitos muitos parabienes i que fagas muitos anhos i cun muita salude.
Un besico amigo tamien pa l tou Juan
Amadeu

Inês disse...

Muito obrigada Amadeu.
Em breve estaremos juntos (espero que no Natal)e o João poderá agradecer pessoalmente.
Um beijinho grande,
Inês