29/11/09

Romántica



...se hai paraíso na tierra, you tengo-lo acerquita, a scassos quilómetros, Sintra.
La natureza nun ye garunha cun nós, se pensarmos que se abre, se dá i se ri para nós, cun ua belheza tamanha. Seia buon tiempo ou malo, Sintra ye siempre magnífica i romántica.
Un deimingo de chuba a pedir mais un casaco por baixo de l ampermeáble, ua gorra na cabeça, ua nuite que yá chamou por mais un cobertor çamorano na cama; un deseio de la giente se ambulber an berde, porque berde siempre me píden ls oulhos; un deseio de un café sien açucre, misturado cun l doce de un trabesseiro de la Piriquita, inda morno, nua salica cunfortáble i panorámica pala bila stórica.

Motibos muito mais que sufecientes para, nua manhana cun borrascos, salir de casa.
L´altemóble deç la sierra pul lhado San Pedro de Sintra, debagar nun se baia a bater nalgua carreira de turismo que chube cargada de turistas; hai sítios an que la strada ten dous sentidos, l pabimento stá sgúbio; l andar sien priessa dá mais tiempo para ls uolhos bebéren tamanha belheza.
Árbores amarielhas i burmeilhas spargidas pula floresta berde, cumo se fússen soles a assumá-se para béren la sierra, l cielo cinzento de nubres cargadas de auga, guapíssemo, einigualable, aquel cielo que dá a Sintra l ar romántico para inspirar poetas i pintores, para dar salude a deprimidos psicológicamente.

L merecido café i trabesseiro, ua corridica para alhá chegar por bias de la chuba, un acunchego calentico na sala, ua chubida para chegar l carro al fin.
Apuis, anté l Castielho de ls Mouros de carro, adónde you gusto de ir a pie, antre paredes altas cobiertas de mofo berde a ressumar frescura, árboles, fetos, abencas, yeras, arranjos de fragones que peç que fúrun pessonas que ls punírun cun sentido stético i adonde nun falta mofo a dar-le berde i berduras a salir de las frinchas para cumpletar l arranjo; mantas de fuolhas amarielhas no chano, las mais registentes inda se stán a cair de las árboles, parecendo berboletas.

Un assumadeiro que mos amostra la Várzea, praino de suonhos, l mar de la Praia Grande, stremunhado pul die scuro i adónde se adebinan óndias altas.
Ua manhana molhada de deimingo, un passeio que dá alento a l´alma, retratos als uolhos que dá gana de pintar cun letras i tintas, esta harmonie de la natureza tan fuorte i al mesmo tiempo tan singela...
Sintra, tu sós ua puorta abierta de par an par pal suonho i pala criatibidade!


4 comentários:

Tiégui disse...

Si, ye mui guapo !

Adelaide Monteiro disse...

Ye berdade Thiégui, ua fermosura i pureza sien lhemites.

Abelhón disse...

Estube ua beç an Sintra: San Pedro, fui de camboio, yá nun sei se era un sítio guapo ou nó porque ls uolhos mirában outros jardins:)

Adelaide Monteiro disse...

Tenes que tornar alhá, agora cun uolhos sólo para Sintra que si bal la pena. Apuis quemer un trabesseiro na Piriquita i ua queijada na Sapa.
Ye de ua belheza rala.
Bs