23/11/09

Porque ls cerras???



Para trás meija la burra, diç l ditado i ye bien berdadeiro.
Para delantre ye que ye l camino, diç outro i nun menos berdadeiro.
Nien todo mundo assi fai i por motibos mui bariados.
Que la giente tenga soudades de l que passou noutro tiempo, até ye normal, zde que essa soudade nun arrime a malina. Ende, a bibir de l passado, ancuntrando que todas las cousas buonas fúrun nesse tiempo i nada agora, ye un bibir a nun bibir i nun hai malzina que cure ls males que aturmentan la giente se nun fur la giente a querer curá-se dessa malina.
Ancuntrar l mal d´antiempos i nun achar l bien que puoderie haber agora, ye outra malina inda maior.
Talbeç faga bien ler ls dous ditados i se esso nun chegar, colgá-los de l cachaço para que stéian siempre delantre l nariç.
Todo mundo ten dies piores na sue bida, an que se bei todo mais scuro i sien que se deia de cuonta, ancomeça-se a quedar meio azambuado. Al menos a mi acuntece-me isso. Anton, hai que sacudir l cuorpo, riagir a essa marrenega i nun se deixar quedar aciburrado, cumo las canhonas a stiar na touça, ne l més de Agosto.
Se possible fazer algo de que se gusta muito, ye la melhor pírula.
Se acauso la giente stá an casa i anda un xudairico, isso ye ua zgrácia. Nun hai alegrie que regista a uolhos laganhosos, pelo zgrenhado, falta de se lhabar i cousas assi porende adelantre. Toca a lhabar, bestir i calçar, dar ua caminadica, i un ben fresco que nien ua alface.
La melhor maneira para nun se bibir de l passado seia el buono ou malo, ye tener oujetibos na bida, acraditar an nós, gustarmos de nós. Se nun gustarmos de nós, nun gustamos de naide i anton andamos acontra nós, acontra quien anda al redor i acontra l mundo anteiro.
Ama-te a ti i apuis poderás amar ls outros.
Fai-te brilhar a ti i apuis berás que ls outros nun brílhan mais que tu i que l brilho de todos juntos relhampa mais, la lhuç ye mais guapa.
Lhuita para ser feliç percurando fazer l que gustas i se acauso l tou ganha pan nun stá nesse çambon de cousas que gustas, fai-las apuis nien que para esso andes cun carro mais bielho, cun roupa sien marca, cun sapatos de ls anhos passados mais que zatualizados, mas fai-lo,...nien que drumas menos horas,… mas fai-lo!...
Nun speres a la aposentaçon, fai-lo lhougo, an cada die,... an cada hora, an cada sfregante.
Lhuita para seres feliç, nun culpes ls outros porque nun sós, isso ye mui fácele para quedar sien auga no sou própio capote.
Abre la risa al mundo, aprécia las cousas simples i guapas. I cousas simples hai tantas neste mundo, anque nun pareça.
Muita beç nun miramos pa las ber, solo miramos l que dá lucro, l que dá nome, l que dá poder, l que dá un carro de alta celindrada. Apuis, anque téngamos esso todo, miramos para nós i somos tan anfelizes,…nessa bida an que mos suicidamos debagarico, an cada minuto, an cada euro de lucro, an cada fato de marca cula marca a bé-se, para que se béia que fui caro…
Mira que uolhos tan guapos tenes!!... Porque ls cerras???


4 comentários:

faustino.antao disse...

Dius mos deia buonos dies

-Ye assi mesmo amiga Dlaide.

-Hai que lhuitar, seia pul que fur, mesmo se fur necáiro pur ua felcidade.

-Que sei you, culas ferramientas que tenemos a mano, ne l die a die de uolhos puosto ne l camino.

-Oubrigado pula guapa mensaige que mos deixas.

-Beisos i un abraço a tou tiu
Faustino

Adelaide Monteiro disse...

Açaga-se muito la bida neste cunsumismo sien medida...
Beiso para ti i tamien pa la tue tie, Faustino.

Ana disse...

Buonas nuites, Adelaide,

Li l buosso testo i sei que gostei de l ler. Cumo yá ye tarde, nun digo mais nada mas manhana spero tornar acá. Felicidades.

AF disse...

Abre ls uolhos i bei l que ye guapo, agora.
Gustei de ler.
Amadeu