10/11/09

Cabien debaixo dun alqueire



...cabien-le todos debaixo dun alqueire, quando l tiu se morriu de pulmonia.
Muita stória dessas se oubie, antiempos.
Marie tenie dous filhos i un que benie a camino que, cun la graça de Dius, naciu muorto porque nun abantou na barriga de la mai, l zprézio de sou pai, quando a todos abandonou, l zgraciado, sien naide saber la rezon.
Dezie-se que habie ido pa l´Argentina, outros dezien que staba no Ouruguai, al cierto naide sabie. Fui-se i nun habie ua alma que soubisse que se iba.
Soube-se muitos, muitos anhos apuis, dezenas lhargas d´anhos, apuis que bieno cun outra tie a querer ardança. Fui corrido por todos, a palos.
Ardança,... inda porriba!
Dues bacas de meias, dous filhos que cabien nua quarta, qual alqueire! To l anho a trabalhar pa l amo de la maior parte de las terricas qu´ araba i pa l amo de las bacas...
You tengo muito que le agradecer a alguas pessonas que me matórun la fome a mi i als mius filhos, muita beç. A muita outra, nó. Habie gente que solo fazie bien se nun soubisse que l staba a fazer; que daba ua mano chena sabendo que iba a recebir dues.
Porque nun pones decotes más grandes, Çastrina, que agora ye moda!!??
Porque tengo un cuolho que se asparece a ua peituga. Nun bedes?
Fui de las fomes que passei an nina. Yá me dezírun muitos doutores. Nun bedes estes uossos salidos para fuora?! Cuitada de mie mai.

Siete ou uito debaixo dun alqueire i todo mundo se criou, cun la grácia de Dius!
Sabe Dius, sabe Dius!...



Sem comentários: