12/11/09

Dius mos lhibre




"Studantes custruindo ua lhagona (lago) cula colaboraçon de l sou porsor a pie de las arbles de la scuola"

I se l mundo acabasse hoije?

Serie ua anjustícia para alguns un albio para outros.

Anton nun serie castigo de mais para la mocidade que stá na frol de l’eidade, ne l çpuntar de la bida atalhar-le ls deseios de un feturo guapo, nun ls deixar cuntinar culs suonhos de montar porjetos i castielhos, çcubrir l mundo.
Si porque hai jubentude lista i çpierta pa l die de manhana, nien todos ácupan l sou tiempo picando i chiscando la cara i l cuorpo, nien todos ándan amostrando l culo i ls arganelos ne l çofino i nas oureilhas, manchando l património, debalde.

Digo-bos-lo you, hai rapazes i rapazas trabalhando muito, cun eideias i saber, que le boto ambeija pul tamanho, que you cula mesma eidade nien m’astrabie. Son cumo reilhas salidas dua frauga, tempradas i prontas para zbrabar adiles nas relaçones houmanas, relbas i aricos na chafurdeira de l poder anstituido, acabar culas bergonhosas çfrenças antes queilhes que arrótan de l ampanturro i ls que ténen de se cuntentar culas sobras.
Mocidade sismada an todo l de buono que ténen las nuobas tecnologias de l ansino, nun haberá ciéncia, spormentaçon, ambestigaçon que les meta miedo. Na medicina, n’eiconomie, na politica i de mias artes séran buonos, hounestos i mais lhimpos que aquelhes que ende hoije stan acaparrados cumo fieras an touça.

Anda por ende muita mocidade que nun merece que l mundo s’acabe tan debrebe, stan cunscientes que ténen que ser eilhes a tomar an manos l feturo deste paiç i deste planeta, stan determinados a dar uas bardascadas ne ls pochos (podridas) desta sociadade. Lhéban cun eilhes ua eiducaçon firme l bastante para nun se deixaren ambolber an trampas nien bender pur zounestidades de giente que cuida que todo stá a leilon.

You sei que nien todos asságan l tiempo, strágan ls cadernos i ls lhibros que tan caros quédan a ua quemunidade, que anda de calças rotas i quemendo fiado pur bias i de ls miserables rendimientos, aporbéitan bien l sfuorço de ls sous porsores i mestres ne ls anhos de scuola i formaçon para star purpurados i treinados pa ls grandes zafios.

La mie fé stá neilhes, ye pur esses que nun quiero que l mundo s’acabe, porque para alguns calafraus que tomórun l mundo cumo só deilhes yá se debie tener acabado hai muito.




Sem comentários: