07/11/09

A cabalho de las palabras


Biaijo a cabalho de las palabras
a çcansar de l tiempo que me pesa.
Çaracuteio carreirones
para me ancuontrar cun l que fui,
anfunisgo-me nos touçones cerrados,
an ribeiros perfumados,
a pedir frescura pa ls mius passos.
Biaijo stremunhada,
antre scobas i spineiros,
que me apeian,
que me angánhan ne l miu çtino,
me ambouban cun l oulor fuorte,
me crában picos na chicha
i me zgrácian de delor.
Quiero achar ua fuonte de auga frie
que me refresque l´alma,
que me stique la piel angurriada.
Quiero salir deste scadal seco
que me seca l manancial de las palabras
i me bota para buracos sien salida.
Biaijo an palabras i assí acho ua frincha,
por adonde resfuolgo
i me deixo arrolhar
por airicos lhebes i serenos.
L que fui,
qu´amporta!!?
L que serei,
quien sabe!!?
Abaixo de las palabras i,
fortalcida,
miro pal mundo,
spreito pal riu
adonde l miu sangre cuorre fuorte i doce…
I,...sigo l miu camino .




1 comentário:

Abelhón disse...

Se essas palabras son de scadal, l que manginar quando arrancares las de regadiu: únicas cume ls melones de l Lhabadeiro!

BEISO.