Tradiçones (dadonde mos bénen!?)

Jugo, forno, pan lhebe (pan de lhó) i polbo cun batatas

I ampeço mesmo porqui.

Dius tenga sue alma an paç, çcanso i an sue cumpanhie (porque yá mos deixou hai muito tiempo) quien fizo l jugo de l retrato que stá ambaixo, assi cumo todos i todas ls i las de l sou tiempo que fazien jugos, carros de las bacas mirandeses, canhiças, rastras, arados, puortas i portaladas, talhos i scanhos, cubas, fornos a lheinha, ne ls telares panhos para las mantas, las alforjas, sacos pa l grano, miotes, jiquetas i chambres, ne l forno de cozer, las fogaças, ls roscos, l pan lhebe (pan de lhó), sien spráncias nien fé de recebir un só teçton de naide.

Até l pior puodie acuntecer, era l produto de l sou sfuorço, ser pedido an décimas i licencias a las finanças.

Este jugo nun ye de bacas, tamien nun ye de béstias (machos ou burras) ye misto, l duonho (recebido de hardança, nunca se fai a çfazer del) lhougo que bir l retrato bai a conhecer-lo, ye miu amigo i cuido que nun me lhieba a mal fazer esta publicaçon, até porque ye respeitador i admirador de ls balores houmanos que mos chégan de ls nuossos antepassados.

Porque solo stá nas mies antençones dibulgar un património i un saber que tenien ls nuossos pais i pais-abós, saber esse que stá cheno de tecnologies para l tiempo, i assi bencir ls porblemas i atalancadeiros, bonda star atiento a las cousas i tener conhecimiento de la natureza i de ls questumes.

Tamien ye un fato que nesta temporada natalicía, quaije todo se mos afigura i peçque nada hai para alhá de la celebraçon de l nacimiento de l Nino Jasus, mas a miu ber nun ye bien assi, hai muita lhigaçon i ben al de riba tanta tradiçon i questumes que las gientes d’hoije ténen porque la trasmisson de l saber até eiqui chega, bonda pensar ne l polbo, no bacalhau, las fatilas paridas, ls bolhos i todo al que ponemos na mesa para quemer.

Bolbendo al jugo (misto), l dunho sabe que you andube por sue casa scando retratos. I spertou-me curjidade este jugo, puis retratos de jugos mirandeses tengo muitos, i fui por ser misto, i ber que l custrutor tubo la preocupaçon de çtribuir bien las fuorças, puis adonde bai a quedar l sobeio nun stá bien al meio, mas si pa l lhado adonde se bai ounhir la baça, seinhas de que la béstia que eiqui ponir l cachaço ten menos fuorça. Tamien adonde se pónen las cornales, ten dues hastes de palo, puis las béstias nun ténen cuornos (las de trabalho) i agarrar doutro modo.

Hoije yá nun se fázen jugos, destes, ye mui ralo ber ua junta de bacas, mista, par de béstias ou burras, yá stá quaije todo mecanizado, mas you tengo las mies dúbedas se ls mirandeses nun ténen outros jugos, por bentura bien piores. Mas ua cousa you sei i engo la certeza, dou-me cuonta quando por alhá ando, als mirandeses nunca les faltará ganas de mantener i guardar todos ls cunferrumes i demais outencílios, la mimória de l sou pobo cun denidade.

I porqui me quedo, deixo-bos retratos, un dua pieça para mi i ls de la mie geraçon tan conhecida, puis an mi casa muita beç i muitos anhos se fizo la sementeira cua junta mista, mas quien sabe para las geraçones mais nuobas nun seia ua pieça çconhecida, outro dun forno de fazer pan adonde mie mai cozie to las sumanas ua fornada, i cumo nun puodie deixar de ser un prato cua polbeira i un dun pan lhebe, quemido desta temporada, porque era tradiçon i que inda hoije se fai na maiorie de las casas.

(jugo, pieça an madeira bien trabalhada, que ten l oujetivo d’ounhir las bacas pa l trabalho ou outras béstias, forno de cozer, adonde se fazien las fogaças, polbeira que se mercaba seco i apius de cozido quedaba assi, pan lhebe, bolho feito cun farina i uobos, que inda hoije la mie tie pon muitas i muitas bezes a la mesa an special quando tenemos besitas)