22/12/11

Las Buonas Fiestas de l Senhor Persidente


Mensaige de Natal de 2011


Mensaige de Natal de 2010


Soutrodie oubi la mensaige de Buonas Fiestas de l persidente de la República i quedei tan ampressionado, mas tan ampressionado, que pensei lhougo que habie eilhi matéria para ua tese an Ciéncias de la Quemunicaçon. Ó nesso ó an Psicopatologie. 


Tengo ua cousa a dezir a todos ls detratores de Cabaco Silba: nó, l persidente nun fizo “copy paste” de l çcurso de l'anho passado. Pul cuntrairo, eisisten tantas melhories, que nin sei por adonde ampeçar. 


Solo para tenéren ua eideia, l çcurso de 2010 ampeçaba assi: “Deseamos a todos ls pertueses un feliç Natal i un buono Anho Nuobo. L Natal ye la fiesta de la familie”. Yá an 2011, ampeça de un modo cumpletamiente defrente: “l Natal ye la fiesta de la família”. Ende stá! L home nun se lhemitou a fazer “copy, paste”, fizo “copy, paste, delete”. Ls que l acusan de star siempre ne l facebook, squecen-se de que el yá sabe mexer ne l Word


Mas tamien hai melhories ne l domínio de la lhenguaige i de las técnicas cinematográficas. Reparai: l anho atrasado l home dixe lhougo a que iba, quedamos lhougo a saber que mos deseaba Buono Natal i Buono Anho Nuobo. Astanho l home cria suspense. Será que l senhor Silba i la senhora sue tie mos deseian Buono Natal i buono 2012? Se quejirmos saber, bamos tener que oubir todo até al fin… Quien ye que andou a ber muitos filmes de Hitchcock, quien foi?


L cenairo stá mais probe, stamos de acuordo. I astanho, culs cortes de l Biegas ne l setor de l cinema, nin sequiera hai denheiro para fazer zooms. An 2010 filmórun nua sala de l Palácio de Belén, chena de luzes, quelor i Arbles de Natal. An 2011 filmórun na marquise de l casal Silba, junto a un presépio modesto, que nun ten sequiera ls reis magos. I este pormenor nun ye çpiciendo. Ye que qualquiera pertués cun buono senso sabe que nun debe deixar antrar un Gaspar an casa.


La direçon de atores ye outro aspeto a salientar. Ambora l Aníbal i la Marie passen muito tiempo a ler l telepuonto sin grande spressebidade, hai pequeinhas bariaçones de spresson, mui subtis, quaije ampercetibles, mas dignas de registar. Reparai ne l mobimiento de l cachaço de Marie, cheno de xarme i de swing. Quando l persidente acaba de dezir “ye na familie que podemos ancuontrar ls afetos que mos dan fuorça”, eilha mira para el, cun proua de l sou home, que le dá muitos afetos, muita fuorça i l'ampede de bibir solo cula reforma de 800 ouros. 


L persidente cuntina, amostrando las melhories na capacidade de síntese. Anquanto an 2010 falou pa ls que sofren “de l drama de l zamprego, de la malina, de la solidon”, astanho falou na “crise”. Ende stá, la palabra “crise” resume todo, podemos abançar, qu'este assunto stá çpachado. 


Chega la beç de la Purmeira-Dama falar. Ls cínicos speran que Cabaco la cuntemple cun admiraçon, cumo eilha fizo antes. Mas el, solo para mos surprender, mira-la de lhado quando eilha diç “partilha”. Bé-se claramente l pensamiento “stá bien, filha! Falas an partilhar, mas quien traç mais denheiro para casa ye eiqui l Aníbal”. 


I ye percisamente Marie Cabaco Silba, na sue grácia femenina, que çfaç parte de l suspense criado ne l ampeço de l bídeo: “deseamos a todos un feliç Natal”. “Anton i un buono Anho Nuobo, nun mos deseian un bouno Anho Nuobo?”, pregunta l spetador, anquieto. I l buono persidente dissipa lhougo las dúbedas reforçando que mos deseia “un anho 2012 tan buono quanto possible”. 


Todo stá bien quando acaba bien! Quedámos cuntentos, ambebecidos cul sorriso de la Purmeira-Dama, sclarecidos cul brilhantismo de l senhor persidente i surprendidos cula bofetada de lhuba branca a todos ls que acusan Cabaco de falta de ouriginalidade. Falta de ouriginalidade ténen ls que se lhemitan a desear buono Natal i buono 2012. Mas quantos se lhembran de dezir “tan buno quanto possible”? Quantos?


I pronto, foi la mie análese. Deseio-bos a todos un buono Natal i un buono Anho Nuobo. Ó pul menos, que seian tan bounos quanto possible.

7 comentários:

Tortulhas disse...

Buonas nuites, ah Fir,

Formidable! Faziste ua analce de trás de l'oureilha, hai muito nesse rádios i nessas talbisones que nien als tous carcanhales se achégan.
Scuita, ls homes de las Porduçones Fictícias yá saberán l tou andereço...ó ándan a drumir!?...
Fuorte abraço

faustino.antao disse...

Caro Firmino

-Bun trabalho, cumo siempre essas analces deixán-mos sien palabras.

-Anton quando bolbemos a tomar café, l redadeiro an Corroios yá fai quantá?

-Un abraço i Buonas Fiestas
Faustino

ACangueiro disse...

Hai falas,a modos de Santas, que spechucan ls nuossos modos suabes i Santos. La santidade de tues palabras culas sobeladas certeiras abren ls buraquitos de çaranda a ber la bida a caminar pa l NUOBO ANHO deseado Suable i Natal Santo pul nuosso Perjidente i sue cumpanha Marie a caminar para Belen.

Porduçones Fictícias cumo diç Tortulhas,
Abraço

Almendra disse...

Palabras teneis-las bós buonas!

Se las cuntas de ls outros bos fázen felizes. Cumo nun haberie you de star mil bezes mais feliç culas mies!?

Feliç Natal cula casa chena, mas de felcidade, de paç i de amor.

Almendra

Ana disse...

Inda hei de ler l buosso testo cun mais tiempo porque siempre achei ls buossos testos antressantes. Ye de testos assi que you gusto. Testos que lhieban las pessonas a PENSAR i nó cumo se poníssen a rezar, inda porriba de zinolhos, cumo metidos nun rebanho i cun uas lhagrimicas ne ls uolhos...

You, Fir, inda stou a la spera de un presidente, ende an Pertual, que antenda que nun sirbe para nada desear « Un bun Natal »... a nun ser para ganhar ls botos de alguns... talbeç de inda muitos anfeliçmente...

Digo esto porque se tal cousa acuntecisse ne l paiç adonde bibo (la França), feliçmente l Persidente habie de las perder las eileiçones i mais rapidamente que l que un pensa !

La laicidade ye un de ls balores fundamentales i neçairos para que ua democracie seia ua berdadeira democracie !!

Un abraço... i Buonas Fiestas assi i todo: fiestas de l solstício de Ambierno, fiestas de passaige de anho... Nun fáltan rezones (Nun hai solo ua !) para que haba por acaso fiestas. Bien l mereceis bós tamien depuis de todos ls testos que mos oufrecistes este anho.

Ana disse...

Inda hei de ler l buosso testo cun mais tiempo porque siempre achei ls buossos testos antressantes. Ye de testos assi que you gusto. Testos que lhieban las pessonas a PENSAR i nó cumo se poníssen a rezar, inda porriba de zinolhos, cumo metidos nun rebanho i cun uas lhagrimicas ne ls uolhos...

You, Fir, inda stou a la spera de un presidente, ende an Pertual, que antenda que nun sirbe para nada desear « Un bun Natal »... a nun ser para ganhar ls botos de alguns... talbeç de inda muitos anfeliçmente...

Digo esto porque se tal cousa acuntecisse ne l paiç adonde bibo (la França), feliçmente l Persidente habie de las perder las eileiçones i mais rapidamente que l que un pensa !

La laicidade ye un de ls balores fundamentales i neçairos para que ua democracie seia ua berdadeira democracie !!

Un abraço... i Buonas Fiestas assi i todo: fiestas de l solstício de Ambierno, fiestas de passaige de anho... Nun fáltan rezones (Nun hai solo ua !) para que haba por acaso fiestas. Bien l mereceis bós tamien depuis de todos ls testos que mos oufrecistes este anho.

Fir disse...

Amigos,

muito oubrigado pulas buossas palabras.

Faustino, nun tengo ido pa ls buossos lhados, mas a ber se cumbinamos esso.

Abraços a todos i Buonas Fiestas.