28/12/11

Suonhos

(cuonta a cuncurso-3)

Sonhei que na pastelarie mais próssima de la mie casa stában a bender suonhos que trasmitian a quien ls comisse un super-poder, l poder de cuntribuir pa la melhorie de la bida an to l mundo.

Para esso, tenerie de scolher un de ls dous: ó suonhos de cenoura ó suonhos de bóbeda. Passo a splicar: a quien comisse suonhos de cenoura serien dados ls poderes para acabar cul zamprego, cula fame, cula delinquéncia, cula bioléncia, cula droga, …, cun todo l qu'hai de malo ne l mundo. A quien comisse ls suonhos de bóbeda, serien dados ls poderes para zambolber nas pessonas la paç, la justícia, l perdon, la bondade, la generosidade, la fraternidade, la sperança, l'alegrie …, cun todo l qu'hai de buono ne l mundo.

Pensei i refleti lhongamente (a sonhar), ne l tipo de suonho que deberie scolher i berifiquei que, se comisse suonhos de cenoura tenie mui que fazer para acabar cun todo l qu'hai de malo ne l mundo i anté cunsidrei qu'aqueilho que tenerie poder para fazer era l mais urgente ne l mundo, mais necessairo de l que zambolber nas pessonas todo l qu'hai de buono, se scolhisse ls suonhos de bóbeda.

Anterroguei-me, (cuntinando a sonhar):
- Mas será buono pa las pessonas acabar cun todo l qu'hai de malo ne l mundo?
- Haberie algua garantie de que las pessonas se sentissen mais felizes?
- Acabar cun to l tipo de malinas trarie felicidade a las pessonas?

Nesta lhonga reflexon (sonhando) lhembrei-me de pessonas que ténen todo aqueilho que se puode desear, na sue cultura i cuntesto social, i que son anfelizes. Pensei que nun ye l mui que tenemos que mos torna felizes, mas si l que fazemos cul que tenemos. Tamien pensei (sonhando) que nun ye l que mos acuntece que mos trai felicidade, mas la forma cumo acuntece.

Cuntinei a pensar sonhando, qu'acabar cun todo l qu'hai de malo ne l mundo podie tener balor pa la subrebibéncia, mas zambolbendo nas pessonas todo l qu'hai de buono ne l mundo ye que se alcançarie la melhor culidade de bida, i anterroguei-me outra beç, (cuntinando a sonhar):
- Será que ls dous tipos de suonhos seran necessairos pa l mundo?
- Será que ls dous tipos de suonhos cuntribuen pa l bien-star i la felicidade de las pessonas?

Depuis d'outra lhonga reflexon (sonhando) scolhi comer ls suonhos de bóbeda, culs poderes para zambolber nas pessonas la paç, la justícia, l perdon, la bondade, la generosidade, la fraternidade, la sperança, l'alegrie …, cun todo l qu'hai de buono ne l mundo.

I assi percurarei comer suonhos de bóbeda, por bós, por todos, para qu'hoije, manhana i siempre cuntine a ajudar a zambolber nas pessonas todo l qu'hai de buono ne l mundo.

Leonardo Antão

Sem comentários: