26/12/11

Que Natal? Si, que Natal?

Que Natal
Para ti, sin trabalho,
Para ti, sin casa,
Para ti, sin salude,
Para ti, rejeitado de ls cuncursos a amprego,
Para ti, marginalizado?

Que Natal
Para ti, sin lhei que te proteija,
Sin família que te caleça,
Sin Gobierno que t'olhe,
Sin naide que t'acuolhe?

Que Natal
Para ti, ampurrado pa la delinquéncia,
Pa la droga,
Pa l spital,
Pa la prison?

Que Natal? Si, que Natal?
Este que nós festejámos,
Que nós ambentamos,
Ye l tou, ye para ti?
Nó! Este Natal, nun ye l nuosso Natal.

Este Natal serie para ti,
para mi,
para todos,
se hoije,
manhana,
i siempre,
bibissemos la fraternidade,
l'alegrie,
la paç,
i la houmildade.

3 comentários:

Almendra disse...
Este comentário foi removido pelo autor.
Almendra disse...

Un abraço arrochado Leonardo!
Guapos bersos!
Si ye bien berdade, cumo podemos querer mantener ls natales de ua classe média que mais parece yá la nobreza d'antigamente?

I l pobo?

Eilhes squecírun se que tamien son pobo.

Passórun a mirar para riba i als debaixo, méten le beneno acontra todo mundo. Nun quíeren que béian que son eilhes que stan a lhebar todo.

Toda la regla ten eiceçones.

leonardo antao disse...

Buonas nuites Almenda:

Muito oubrigado pul buosso simpático i antressante comentairo, que mostra que stais atentos al que se passa nesta época de Natal, al cunsumismo “de ua classe média que mais parece yá la nobreza de antigamente”, que se squeciu que tamien ye pobo.

L Natal nun ye ua época feliç i alegre para todos. Ye mui triste i anfeliç para aqueilhes que pouco ó nada ténen, ó que passan por deficuldades bárias, de zamprego, de solidon..., que son bítimas de la crise. Oxalá qu'esta crise ne ls ajude a reaprender l sprito de Natal, a sermos menos cunsumistas, mais solidairos…, mais houmanos.

Un abraço arrochado
Leonardo