Cada beç mais medonhos

Cada beç mais un se perde ne ls touçones!

Será que tamien ls rocos i marifusas ténen yá miedo deilhes i por isso nun nácen a pie de las urzes i de ls pinhos? Nien un se bie!

Fui a ber ls pinhos para ber se habien medrado cun l boro que l botei hai mais dun anho. La pormeira tierra, na Malhada si la achei i que guapicos stan de tan berdes séren i sien ls capulhos de ls burgos.
Dezie-me Porfírio: Toda essa malina se l bai assi que ancomeçáren a medrar cun l boro. A bien dezir ancuntraba you que solo un milagre de Nuossa Senhora de l Naso ls salbarie de tamanha purga, eilha que ls mira de l cabeço alhá loinge. Quien sabe, sabe i, por isso, fui acarditando cumo quien nun quier çfazer de las palabras de ls antendidos. Ne l berano nun tube modo de alhá ir, talbeç por ne l berano ls touçones inda séren mais medonhos cun aquel modo de ancomeçáren a arder cumigo andrento...
Apuis dixe-l a la mie perra: Queda siempre a la mie borda, nun benga un lhobo i te coma, al miesmo tiempo que puxaba un trampo seco para me stribar i lo amenaçar s´acauso el assomasse por trás dua touça. Metimos-mos por ua rodeira para ber se assi seguiemos melhor camino i eibitába ua lhumbeirada cun un pie preso a ua carqueija.
Porque an camino seguido se abanta, acabemos por mos meter Moura adrento i perdimos-mos. Mas adonde seran ls pinhos aqueilhes?
Apuis seguimos al para baixo, a búltio, por antre aqueilhes touçones de lheinha rebielha, cargadica de mofo quelor de prata.  Son guapos aqueilhes tunes cinza azulada cun chano berde adonde ls pies s´angarabielhan. Tornei a birar a la squierda i apuis, por antre aquel monte todo alhá abistei un berdico mais bibo. Mira que guapos stan Jomba!, dixe-le you a la mie perra! Se la giente fur falando siempre queda un pouco mais afouta. Apuis lhadraba la perra cumo se houbira antendido la mie cumbersa. Bamos a cantar Jomba! Cau, cau!, dezie eilha.
Mal será que oubindo la mie boç, l lhobo nun se baia. Jumbica!, siempre arrimada a mie, mie linda, para ber se chegamos al Natal sien caneiradas ne l cuorpo.

Adonde fuste?, percurórun-me yá acerquita de casa.

Ui tan loinge! Parende yá nun puode ir un solo! Mira se partes ua pierna!? Bá, inda tenes la perra que lhebarie la giente al sítio...

Teneis rezon tie Sabel, yá nun se rompe porende afuora!

Meti la mano ne l bolso de la çamarra i bi que nun habie lhebado l telemoble...

Nun tarda que ls touçones mos éntren casa adrento!...