04/10/10

Screbindo, solo pul gusto de screbir...






Stou screbindo i mirando l cielo que me entra pula jinela abierta, para recebir la frescura de l´Outonho.
Cun la chuba las rosas tornórun a nacer ne l jardin i las coubes stan agradecidas al cielo i béian-se medrar a uolhos znudos a cada beç que las besito, to las manhanas, cun ua chábena de café na mano.
Ls diospiros ancomeçorun a amadurar i nun tarda que quéden solicos na árbole mais parecendo un anfeite de roscos na fiesta de ls tabuleiros de Tomar.
Gosto de l´Outonho, percipalmente ne l Praino i eiqui an Sintra.
Mantos de fuolhas amarielhas yá remolinan i las mais registentes ténen un quelor digna de la paleta dun pintor ampressionista.
Las sementicas yá ancomeçórun a botar uns biquitos de fuora i debrebe ls cerrados starán berdes, para matáren la fame de la sequidon de l Berano.
Biaijo i beio ls pelhiços a querer abrir, arreganhados, prontos a soltar las castanhas que me hán-de chegar an oulores de la feira de las Mercés anrebulhadas nas fuolhas de las paijinas amarielhas, al pie de ls púcaros de chicha de cochino, frejida an tamperos de bino, alho i pimiento, an barraquitas de mesas corridas, fazendo-me lhembrar la posta quemida nos cabanhales de l Naso.
Miro para fuora i las nubres son brancas, cuorren a dreitos al mar rebultoso de Sintra, para se íren a ancher d´auga. Mais auga há-de benir para que ls nabales médren, que mais nun seia nua lheirica que sumiei eiqui al pie de casa. Truixe l nabal parqui an ponto pequerrico, puis nun hai cumo un caldo de nabiças acabadas de apanhar i nun hai melhor malzina pal stresse do que uas guinchas i un rebulber de la tierra cun las manos znudas.
I la bida cuorre serena eiqui, ne l rinconico adonde bibo arrodiada de árboles selumbreiras i d´Outonho, un Outonho que me besita an cada passo...

3 comentários:

ACangueiro disse...

Las coubes ten buona cara...ainda onte comi un caldo de berças de las mies eiqui de l miu quintal.

Beisos,

ac

Adelaide Monteiro disse...

L retrato fui tirado antes de chober, agora stan yá mui grandes. las de l caldo berde i las tronchas stan noutros canteiros. Estas son bróculos i coube flor.
Tengo que aporbeitar adonde nun hai selombra de árboles.
Tu tamien matas assi l stresse!! A guinchadas... Ye bien melhor que drogas.

Beisicos,

Delaide

Adelaide Monteiro disse...
Este comentário foi removido pelo autor.