27/10/10

Nesta nuite de siléncios

Sigura-me la mano que te stendo, nesta nuite de siléncios.
Hai lhobos a ouliar ne l miu peito para fastar l miedo que a las bezes se me assoma ne l peitoril de la jinela dadonde miro l mundo.
La mano nun chega para me tirares este friu que me cuorre na spina.
Nó, nun chega!
Nun me dés chinchin porque las mies piernas stan frimes i, a chinchin, nun sentirie ls carinos de la tierra al modo de caminar. Deixa que you camine nesta eimensidon de zertos para, assi i todo sentir ne ls mius pies, la aspareza de la arena.
Dá-me cuolho, un cachico que seia, solo l tiempo que me passe este sanlhuç que se me arrimou i que me bén de andrento, bien de andrento… Hei-de quedar ende, cumo un gato anroscado a la borda de la cinza, un sfregante que seia.

Nun me assustes para se me ir l sanlhuç, nunca l susto há-de tirar este atafanho que me nace nesta baranda birada pa la stranheza cun que miro para todo…
Deixa-me solo star...

2 comentários:

Zzç disse...

Muito bonito. Gostou-me :)

Mas, quei quier dezir sanlhuç? Ye scuridade?

Adelaide Monteiro disse...

Sanlhuç quier dezir soluços( ls outros que nó a chorar), aqueilhes soluços que fázen doler l peito i que pássan cun un susto derrepente.
Bien haiades pul antresse.

Delaide