20/10/10

Armadielhas quaije tan bielhas cumo l mundo




Fui Foustino que mos falou de páixaros i de rateiras i you debo dezir que ls caçadores que hai hoije (fardados, cun spingardas modernas i nun sei que mais) nun me méten, a mi pessonalmente, tanta ampresson cumo la lhembráncia stroudinária que tengo inda hoije dun primo miu por eisemplo, an Sendin, quaije de la mie eidade que tenie muito jeito (i inda debe de tener, esses questumes un nun ls perde facelemente, quédan siempre para la bida anteira !) para ir a saber de formigas grandes ne l termo i traer depuis para casa cuntidades de páixaros que cunseguie caçar i que acumpanhában, cumo inda hoije se fur preciso, un bun guisado cun patatas, arroç ou massa. Todo esto durante l Berano, ne l ampeço de ls anhos 70.

Ye preciso ber inda porriba que nós somos dua família an Sendin que ten cumo nomeada « Ls paixareiros » ! Nun admira anton que l questume de caçar páixaros nun se perda facelemente antre nós i se transmita até dua giraçon a outra.

Miu pai, tamien « Paixareiro », mesmo an França i yá ne ls sous 70 anhos, inda cuntina el tamien a cada beç que puode ou le dá la gana a caçar páixaros cun rateiras – cousa que normalmente até penso que ye proibido a tal ponto que un nien ancontra essas rateiras próprias para caçar páixaros a bender an qualquiera sítio.

« L bício nunca le passou ! » questuma até dezir mie mai.
« Queixa-te!, responde-le miu pai i depuis faç-le la pregunta: Tenes que saber l que quieres ! Cereijas, morcones, figos i diospiros tamien daqui a un més ou dous... ou ua cambada de mielras i outros páixaros qualquieras que quaije arrebánhan todo ?»

Mas para bos dezir la berdade, you pessonalmente, fui na Anglaterra an 1977 eisatamiente que cheguei a ber mais páixaros na mie bida, ne ls jardines, mesmo a la borda de las casas ; i até parece que nien tenien miedo. De certeza que se stubíssen alhá a bibir mais Pertueses cumo miu pai, i antre eilhes tamien Pertueses de la Tierras de Miranda, yá nun habie tantos páixaros cumo era anton i inda debe de ser l caso na afamada Albion… i esso mesmo que seian probablemente tamien proibidas alhá essas armadielhas quaije tan bielhas cumo l mundo que son las rateiras.

Rateiras... p'ra que bos quiero ?!

2 comentários:

faustino.antao disse...

Oulá, muito buonos dies

Porqui anda un "Publicitairo" ne ls uorganos d'anformaçon, que se puode outelizar eiqui, cabe mui bien ....bibir bibie, mas nun era la mesma cousa....
Ora cumo to l mundo sabe, se un die nun andubíren porqui estas criaturicas tan guapas i straourdinairas que la mai natureza puso a pie de nós, nunca mais será la mesma cousa, até an muitos causos yá se perdírun para siempre, i apuis nun hai modo de arreglar tal stado.

Mas tengo muita fé nas nuobas geraçõnes, nun me squeço que quando la mie rapaza era nena, chourou quando ancuntremos un paixarico muorto nun camino (cousa que you nunca farie cula mesma eidade).

Parabienes puls testo amiga Ana, cumo you bos antendo.

Tamien miu abó francisco(de las saias) tenie la nomeada de "paixára", mas neste causo nun sei porquei, tenerie algue haber cua queston destas?!

Até un die destes.

Beisos

Ana disse...

Amigo Foustino,

Nós inda cheguemos a cunhecer esses tiempos an que las pessonas caçában páixaros para ls comer porque, cumo sabeis, denheiro nun habie muito. Hoije, cumo ne l caso de miu pai, ye mais ua tradiçon que outra cousa se bien que se el inda cuntina a fazer esso ye porque acha que ye tamien ua maneira de nun ber toda la fruta ou quaije (que ye tamien l fruito de l trabalho del) comida puls páixaros.

Mas las cousas múdan na realidade ! You por eisemplo inda nunca cacei nien sequiera un páixaro na mie bida i até nun gusto muito de gatos porque sei que a eilhes tamien les passa pula cabeça caçar páixaros mesmo que nun haba necidade... Esto digo you, mas quien sabe l que passa pula cabeça dun gato ? Son eilhes animales tan andependientes !

La nuossa nomeada yá ben pul menos de l pai de miu abó, l’abó de miu pai. Puode haber ampeçado até ne l seclo XIX. Fui por esse miu antepassado, talbeç bisabó, chegar un die a la aldé (Sendin) depuis de haber ido pul termo i traer anriba de la burra (segundo cúntan) bastantes páixaros que habie caçado tamien pula cierta cun rateiras. Esses páixaros éran (se bien me lhembro l que me chegou a dezir miu pai por eisemplo): mielras, tordos i rábios-ruços antre outros mas inda habie mais; you ye que nun me lhembro de ls nomes de momento. De certeza que esses páixaros nun ls deixórun stragar. Era só l que faltaba ! Bien cuntenta quedou la família nesse die de certeza ! Nesse die i ne ls outros !

Cumprimentos

Ana Maria