11/10/10

Pintei-te...

Pintei-te i pintei-te cun pincelhadas lebes para que ls tous sonidos nun se amedruncássen.
Zenhei-te na tela solo al de lebe porque l pincel fui comandando l traçado de ls mius hourizontes. Para que l cuorpo stubira preso a algo firme i assi, solo l pensar se me scapásse para loinge de ls terceiros de mie casa adonde sparijo las tintas i ls debaneios, stube,... sintada nua fraga.
Sintada nessa fraga fui oubindo ls ranacalhos nun ribeirico que siempre se seca ne l berano. Mas eilhes alhá stában,… nua auga que you l truixe…
Ls grilhos sobreponien-se a todo i alhá quedórun an sous buracos, que nunca you bi un grilho de nuite. Quedórun ne ls buracos de las guitarras que ambergonhadas se straformórun an cuorpos que todo deixa ber. Solo l moucho que melhor bei de nuite que pul die dou cun ua i, alhá quedou a piar, prouista, porque nunca el habie tebido eigual catedral para pousar.
Pintei-te cumo te sinto, serena, tamanha cumo l ouniberso metido ne ls hourizontes na mie pequenheç...

Pintei-te cun manos de prumas, para que ls paixaros acoucados nos silbeirones i scobales adonde çcansan sous bolos i cantigas, nun spertássen...





2 comentários:

"Scacição" disse...

Dius mos dé buonos dies Adelaide,que pinceladas tan guapas i singelas!Gustei de ler este quadro!

Bien haia antre monas i bolácios:)

Adelaide Monteiro disse...

Bamos a ber se apuis l´eidenteficas...
Stan quaije a salir ls nuossos sbolácios,... ls sbolácios de cinco mulhieres mirandesas.

Beisicos,

A.