19/10/10

Buonos Dies, Tiu Juan


Trasdonte ó trasdontonte, nun stou bien cierto, la SIC strenou un porgrama que diç que falaba de famílias i ua de las scolhidas era la familia de l tiu Juan, de Bergáncia. Ami passou-se-me i yá solo apanhei la parte de l fin, mas subre essa família puodo you falar que yá quantá que la conheço.
La Família de l Tiu Juan – ó Buonos Dies Tiu Juan - ye un porgrama de un de ls rádios de Bergáncia, arrimado a más de binte anhos, talbeç l que más giente oube, al menos you, calhando tener que andar de carro a la purmanhana, que me toca muita beç, se me hei de ir einojando a oubir falar de la bola ó de la crise, nun le perdono a ir oubindo l Tiu Juan i las pessonas de la família, inda la semana atrasada scuitei un nuosso camarada eiqui de las Froles, que tamien talfonou par’alhá (biba José Ventura, un abraço!).
La receita de l porgrama ye simples, que yá se sabe que son las más buonas: to ls dies de la semana, antre las seis i las uito, Tiu Juan bai ponendo uas músicas i cumbersando cun las pessonas que talfónan (ls tius i las ties, primas i primos), para dezir l que le dir na gana; eilhes cántan, eilhes rézan, cúntan cuontas, tócan rigaleijo ó harmónico ó guitarra o l que seia, you sei alhá, inda esta semana era la semana de las “cantigas de l ceguinho”, oubi uas quantas bien piroleiras. Quien nun cunhece yá bei que ye ua cousa assi a mode de rede social de la giente de ls pobos de Trás-os-Montes, i mesmo de más loinge, hai muito que fala anté de l strangeiro, que scúitan l porgrama na Anternete. Stou cierto que para muito l tiempo de l porgrama ye l cachico más amportante de l die, i tamien çcunfio que poupa muito calmante, muito anti-depressibo i muita ida als doutores de la cabeça. Mas ye más: eilhes amánhan-se para fazer biaiges an Pertual i para fuora (muitos doutra maneira nunca chegarien a tirá-se de casa); ajúntan denheiro para acudir als zbalidos (mercar cadeiras de ruodras, ócalos, ajudar quien l’arde la casa…), quier dezir, cousas cun merecimiento que you admiro i respeito. Dezido de ua maneira más fina, l porgrama esse ye un study case, i yá serbiu mesmo para alguns studos de ounibersidades. Cumo hai muito mirandés de la família, cuido que tamien cabe eiqui.
Assi i todo, l más formidable inda stá por dezir: Nicolau Sernadela, l home por trás de l Tiu Juan, ye un rapaç de l miu tiempo i era DJ (si, ponie l discos a tocar) nua çcoteca quando you era studante an Bergáncia, de maneira que inda le ajudei muita beç a “eimalar la troixa” quando era para buer la “arrancadeira”. I quereis saber la melhor? L rapaç ye tato. Si, tato! Mas nun ye que çaçameilhe, ye tato, tato. Ora, un home tato que ganha la bida a falar ye ua cousa formidable i ye eiqui que a mi me gusta poner ls uolhos: fazer de las fraquezas fuorças i arrepassar las talanqueiras que la bida mos pon ne l camino. I tamien cuido que puode serbir cumo eisemplo para l que toca al mirandés, lhéngua, a ber de arranjar maneira de nun le deixar dar la “bicha-matose”, cumo diç Tiu Juan.

7 comentários:

Ana disse...

La « bicha-matose » quien la faç aparecer ou reaparecer son aqueilhes que ténen todo antresse an que se squéçan feridas de que eilhes fúrun tamien ls respunsables. Mas las feridas inda stan por todos ls lhados i só ls ciegos ye que nun las quieren ber !

Unknown disse...

Tamien tu, Tortulhas?!!

"dai-le cun fuorça"

L outro sitio staba cheno i eiqui tamien hai spácio...

Nun quergas cunfundir, naide diç que ls Galandum Galundaina nun son buonos musicos, agora l modo i l uso que dán a la musica ye que nada ten a ber cul mirandés i cul balores de l Praino.

Naide te tira l balor que tenes cumo scritor mirandés...mas...you ye que sou l politiqueiro...

Agora...bá ber se fazes cumo l'outro que dezie:
"gusto de ls homes que dízen las cousas na cara...mas de ls outros, porque se me las dízen a mi nun torno a falar culhes"

Ten rezon Ana, son las moscas que fázen aparecer la "bicha-matose"
Ah! la "mixomatose" ye ua malina que faç ls coneilhos quedar culs uolhos papudos para nun béren nada...

Tortulhas disse...

Buonas nuites,

Cun alma,Almendra, cun alma! L que you screbi fui "dai-le cun alma"; qualquier'un bei que quier dezir "tocai i cantai cun alma", i queda loinge de l buosso "dai-le cun fuorça" i de l significado retrocido que you cuido que le quereis dar.
Bamos a ber: bós teneis las buossa rezones i la buossa oupenion subre Ls Galandum; you tengo las mies i tengo outra çfrente. Qual ye l porblema? A mi, la buossa nun me calece nien me arrefece; nun antendo las cuçquinhas que la mie bos fai a bós.
Anton stamos nun sítio de pensamiento lhibre ó l sprito eiqui ye de Ounion Nacional?
I podeis quedar cierto que solo bos respondo por bias de l respeito que me mereceis i de la buntade de fazer cousas que bos recunheço; quando nó, nien me daba al trabalho de bos zbirar repuosta.
Un abraço, a las buonas, cumo diç Abelhon

Unknown disse...
Este comentário foi removido pelo autor.
Unknown disse...

Tortulhas,

Çculpa la anterpretaçon que dei a la frase "dai-le cun alma", antendi-la noutro sentido.

Mas nó ne l que diç respeito al trocar alma por fuorça, porque para l mirandés alma ye "bida" "fuorça" "bigor", yá era antes de l crestianismo chegar al Praino.

Quanto a dezires que nun respeitei la tue oupenion subre ls Galandum nun ye berdade, nun cuncordei fui cula frase "dai-le cun alma" i que antendi noutro sentido. Nun fui por agabares ls Galandum.

Quien pensa que debe haber Ounion Nacional, son ls lhougo aparecírun a insultar quien manifestou la sue oupenion.

Agora un cunseilho de amigo, responde siempre porque se muitos fázen las cousas an riba de la burra ye porque naide ls ansinou, ou nun ténen ajudas ou modos de l fazer doutra maneira. Naide ye tan amportante para mirar ls outros de riba.
Un abraço
Almendra

Tortulhas disse...

Biba, buonas nuites, Almendra!

Bedes la "bicha-matose"?! deziedes que ls coneilhos quedában cun ls uolhos papudos i nun bien nada i afinal quien biu mal fustes bós. ;)

I nun béngades acá a spechucar cun mirar de riba nien mirar de baixo, que eiqui naide ye menos nien más que naide, muito menos l filho de miu pai; Dius permita que you puoda cuntinar a mirar a dreitos pra to la giente - mormiente pa l speilho - i, buono, a podé-le dar ua piscadelica se fur ua moça guapa.
Un abraço

Unknown disse...

Buonas nuites, Tortulhas.

Gustei desta, tamien mos fázen bien a las bezes estas liçones.

Un abraço
Almendra