Lhiberto-me nun oulor de rosa
Cun la mie alma antregue a cantigas de reissenhores
Antre arboles de berde ancerado
E sinto-me chefe dessa ourquestra
Cantando suonhos, tocando hinos de bitórias
Nun feturo tanta beç adiado.
Pongo las soudades an riba de ua lheitariega
Para que nun die de bentaneira
Cun sous stames secos bólen
E boto ls mius suonhos a manar
Andando mais debrebe que ls pies me déixan
Porque solo assi ls fago caminar…
Nun ye cun l passado que castielhos se eidefican!
I, assi bou caminando
Por estes zertos de mundo
Que tanta beç nun l sinto miu...
Çaracutiando i bolando cun la lheitariega
Lhiebo suonhos siempre adelantre
De la bida que bai passando
Tanta beç smerzingada...
4 comentários:
Buonos dies Delaide,
Quei ye smerzingada?
bs.
A:
Oulá Amadeu!
Gasta, cansada.
Dezie mie mai quando benie de la bima ou de la relba: Stou tan smerzingada.
La prenúncia ye smarzingada, bei tu cumo ye melhor screbir.
Bs
A.
Mirai pa delantre, fazei castielhos ne l aire i apuis bolai..
bjs,
ac
Assi bou fazende, fazendo castielhos mas cun ls pies bien assentes...
Beisicos Antonho.
Adelaide
Enviar um comentário