15/05/10

Respuostas uocas



Muitas éran las bezes que daba cun el a fazer percuras. I quando un home se bota a fazer-las a si mesmo ye porque nun las ten de fuora. Percuras que se calha nun tenien respuosta, percuras que nunca habie eimaginado fazer-se-las a naide. De l mais deilhas solo tenie l ressono cumo se fussen ls marmurios dua cuncéncia acobilhada de culpas i d’ancertezas, outras l bruido cumo se fúran calhaus botados nun poço bien fundo. Fazer-las para quei, porque nun quedaba calhado, se yá sabie que nun tenie respuostas, mais balie que nun las fazira nien a el, mas nun era capaç de quedar cun eilhas antrasgadas, nun era capaç d'adominar-se, tenie sido anxertado an cuorno de cabra pula cierta. Agora fazie-las cumo miserables çculpas, cumo s’assi yá tubisse perdon. Nunca naide se puode agabar de s’eimendar culas percuras que nun ténen respuostas. Balditas percuras sien respuostas que pícan tanto cumo pelhiços guiros

2 comentários:

ACangueiro disse...

Nun hai resposta para todo i ls pelhiços guiros son buonos para coçar cumo las percuras.

abraço, tiu Carrasqueiras,

antonho

leonardo antao disse...

Buonas nuites Antonho Carrasqueiras,

Este buosso guapo cachico de testo, “…cumo se fúran calhaus botados nun poço bien fundo”, fizo-me lhembrar esta stória dun calhau.

Habie nua nuossa tierra de l Barrocal, an Zenízio, un grande calhau que tenie scrito:

Quien de l'outro lhado me buoltar,
grande tesouro há-d'achar.

Mas l calhau era tan grande que naide se atrebie a lhebantá-lo. Até qu'un die un balenton l tio Maxemino, mui fuote i corajoso se abinturou. Mas quando lhiebantou l calhau deparou cun outro lhetreiro:

Faziste bien an me buoltar,
yá staba farto d'assi star.

"Las balditas percuras sien respuostas", son cumo ls calhaus dun camino, ajudan-mos a caminar cun mais cuidado, cun mais calma i la çcubrir ls nuossos tesouros i que yá stabamos fartos d'assi star.

Un abraço,
Leonardo