14/05/10

Ben Ende Ua Tragédie



Eiqui hai uns tiempos, l nuosso cumpanheiro Leonardo Anton lhançou un zafio a todos ls mirandeses i amigos de l mirandés residentes an la Grande Lisboua: fazer ancontros para falar mirandés. You acho que faç todo l sentido que quando se junte un grupo de pessonas que saben mirandés (uns mais, otros menos, cumo tudo an la bida), seia essa la lhéngua de eileiçon para se falar. L porblema ye que, a las beçes, faltan pretestos para las pessonas se ancuntráren.

Quiero dar-bos un. Que tal irmos todos a ber un colóquio? Ls atores ban representar an pertués, mas ne l final, podemos siempre criticar an mirandés. Que bos parece? Ye buona eideia, nun ye? Bamos anton al momento publecitairo.

An Outubre de l anho passado, Suzana Branco, la ancenadora de l grupo de triato amador de la SMUP, zafiou-me a screbir ua berçon de Las Bacantes de Eurípides, adatada als atores, al spacio, al público i a nós própios. Relemos l testo, lemos bárias teories subre l mesmo, bárias críticas a spetáclos i testos de ancenadores que yá l muntórun i apuis reunimos-mos para «cozinar» todo i arranjar maneira de ultrapassar las deficuldades (subretodo técnicas).

Anspirados por testos de Pirandelo, Lorca i Brecht, i por algues rialidades atuales, acabámos por criar ua antriga nuoba. L spetáclo yá nun ye ua berçon de la última tragédie de Eurípides, mas la stória de un grupo de triato que tenta representar Las Bacantes. Nun se pertendiu sbaziar nin çtruir un clássico, nien torná-lo lhigeiro. Quejimos subretodo dialogar cun el i percurar nuobos sentidos.

Será que cunseguimos? Esso ye l que quiero que me dígan -- an mirandés, ye claro.

Datas de las apersentaçones:
- sesta 14 de Maio, 21:30;
- sábado 15 de Maio, 21:30;
- sesta 21 de Maio, 21:30 (lotaçon sgotada);
- demingo 23 de Maio, 16:00;
- sesta 28 de Maio, 21:30;
- sábado 29 de Maio, 21:30;
- quarta 2 de Júnio (béspera de feriado), 21:30;

- Local de las apersentaçones:
- anstalaçones de l Murtalense (Largo João dos Santos, 10, Murtal, 2775-102 Parede).

Para chegar, basta seguíren l mapa abaixo, ó percurar anstruçones ne l google maps.





Se fúren de camboio, puoden salir an S. Pedro do Estoril i seguir a pies até al Murtal (ye perto).

L spectáculo dura aporximadamente 70 minutos i nun se paga mas deben reserbar antrada atrabés de l amail smupalenses@gmail.com ó de l telimoble 966947471 (Miguel Lourenço).

Se puderdes ir, dibulguen. Se nun puderdes ir, dibulguen tamien. Oubrigado i até brebe.

Testo: Firmino Bernardo e Suzana Branco (a partir de As Bacantes de Eurípides).
Ancenaçon: Suzana Branco.
Cenografie: Bárbara Pinto.
Interpretação: Alexandra de Matos, Alice Costa, Cristina Guerreiro, Cristóvão Santos, Fátima Calás, Helena Fernandes, João Azevedo, Manuel Jerónimo, Miguel Lourenço, Mónica Saraiva, Sofia Magalhães.

2 comentários:

leonardo antao disse...

Buonas nuites Amigo Firmino,

Fico cuntente an ber que cuntinas a relembrar-te desse zafio d'ancuontros para falarmos mirandés.

Acho buona eideia irmos ber l colóquio que tue screbiste “ua berçon de Las Bacantes de Eurípides” i ne l final, criticá-lo an mirandés.

You apoio la tua eideia, i cumbido ls falantes de mirandés, an special ls que biben na area de la grande Lisboua, para irmos a ber esse colóquio ne l die 2 de Júnio a las 21.30 i, ne l final, comentá-lo na nuossa querida lhéngua mirandesa.

Un abraço,
Leonardo

Fir disse...

Buonas nuites, amigo Leonardo.
Oubrigado pul buosso apoio.
Gustaba de bos ber por alhá, seia an que data fur.
Un abraço,
Firmino