PARA ALHÁ DE NÓS
Cansamos-mos a pensar nun mundo a la nuossa medida i a mirar para nós mesmos, cumo se furamos l umbelhigo de l mundo i nien mos damos cunta que hai outro mundo para alhá de nós, mundo de giente que pensa eigual i de giente que bibe i faç bibir l mundo. Por esso l HOIJE faç todo por bos amostrar muito de l que hai para alhá de cada un..
.
Las obras.
Neste die son las obras de la rue de la Picina de Sendin, que staba a pedir trato cumo ua pessona chena de fame piede pan. Ne l Berano yá bai a star mais guapa i airosa, ls trabalhadores de la Câmara trabalhában pula manhana ne l arranjo de ls passeios i nós al passar paremos a tirar ls retratos, mas tamien a amostrar-les que bien acerquita deilhes habie un campo que se rie de cuntento.
.
...un campo que se rie de cuntento....
Tamien faç bien fazer de l trabalho tiempo de cumbibéncia i alegrie. Para alhá de la crise hai outro mundo i ye este mundo que deberie ser amostrado para que serbisse d’eisemplo. Eiqui naide pensa an TGV ou Aeroporto, eiqui bemos rues, stradas, barraiges i tierras a dar trabalho a centenas de trabalhadores.
4 comentários:
Las colores de Primabera son buonas para spertar i apuis bós sodes malicos; poner esses cheiros eiqui ye mesmo para fazer ambeija a quien nun puode star a sorber l aire que ende bai...
saludo,
acangueiro
Para ls reformados:
You fago d'apreposito, para ber se deixais de beç la cidade adonde yá nun stais a fazer nada. Nun teneis porqui un buraquito adonde bos meter? Agora reformados stais a mirar para las selombras de las casas i a respirar l fumo de ls carros? Quedestes biciados culs jumbos i cuntinentes? Yá mireste bien para ls retratos? Adonde hai un cielo tan claro i azul? Ls filhos tamien yá son grandes yá se gobérnan bien eilhes solos.
Sien sou bien malico, Antonho...hehehe
Bou-me a quemer un cachico de chouriço anriba l pan...
Abraço
Almendra
I apuis bou-me palas arribas a tirar la yerba a uas almendreiras...Oubo ls paxaricos a cantar, beio las águilas i ls abutros, miro l riu i íncho ls pulmones de aire puro...
bós nun sabeis que l trabalho ye ua birtude i esso de nun fazer nada...ls filhos inda tenen que comer muita códia para se gobernaren solicos.
abraço,
acangueiro
Enviar um comentário