02/05/10

L cumbíbo de ls Boubielhos an Lisboua




L die até dou seinhas de nun querer ajudar, benie de mala cara, anubrado, algua chuiba, mas apuis resolbiu-se a deixar l sol aparecer .

I stubo un die eicelente, que l dígan ls muitos Boubielhos sous familiares, amigos i cunterráneos que stubírun ne l cumbíbio/jogos de l purmeiro de Maio, na Quinta da Marialva an Corroios, terminado pula Direcion de l’Associacon Cultural i Recreatiba Nial de la Boubielha.

Fui un ancuontro que nun quedou nada a deber als demais feitos ne ls redadeiros anhos, las pessonas ajudórun ne ls purparos, todo l mundo quemiu i bubiu i se debertiu.
La cara de las pessonas nun anganha, aqueilhes que ténen mais jeito pa ls jogos a eilhes s’antregórun ls demais cumbersórun i lírun poesie an mirandés, que ye bien quemun a la maiorie de la quemunidade.

Estes ancuontros ténen sido la berdadeira miolha de la nuossa ounion, ténen sido un cachico fuora de la nuossa tierra d’ourige, ténen sido l sítio cierto adonde la maiorie de nós dá lhargas a l’alegrie, zanferruja la lhéngua mai, cunta cuontas de la sue anfáncia i mantén cuntato culs questumes, tradiçones de la region de Miranda. Ten l’ouportunidade de star culs sous, tener nuobas de ls amigos i poner las amboras an die. Matar las suidades, i arranjar fuorças para ls zafios que anfrenta to ls dies

Cumo yá ben acuntecendo fui ne l spácio çponibilizado pula l’outarquie ne l terreiro de las fiestas de Corroios, lhocal eicelente i bein maneirico para pessonas cumo nós que mos gusta l termo.

Ai que lhoubar la buona ajuda de ls associados que ne ls dies antes trabalhórun para que nada falte, la colaboraçon dada pul Persidente de la Junta de Freguesie de Corroios i sue eiquipa, ls Zeniziense quando assi ye nunca l squécen i teneran siempre l reconhecimiento.

1 comentário:

leonardo antao disse...

Amigo Faustino,
La nuossa Associaçon Nial de la Boubielha está de parabienes porque tube ua de las maiores i melhores partecipaçones de siempre de ls sous associados i de amigos i familiares de ls assocoados
Somos cada beç mais a acreditar que l maior balor que tenan associaçones cumo esta nuossa ye l de la amisade que se bai mantenendo i criando antre las pessonas que partecipan nos eibentos.
Yé berdade que este eibentos son un amportante ato de respeito a la mimória daqueilhes que anfeliçmente yá mos deixórun i aqueilhes qu’inda stan antre nós, que falam ne l die a die la nuossa Lhengua mirandesa i jogan ls nuossos Jogos Tradicionales, cuom l Fito i la Barra cun reilha.
Nun podemos deixar muorrir-se isto que mos da muita proua i mos permite fazermos uns eibenteos i ua cunfraternizaçones cun momientos ancumparables”.
La fuoça desta e nuosso Nial de lav Bulbielha está an mantenermos la fidelidade als questumes i tradiçones de mirandesas de Zenízio i, mui amportante, an mantenermos biba la lhéngua mirandesa, que cun la ajuda de l nuosso stimado Amadeu Ferreira, de Adelaide, de tin Faustibno de Valter de Basilio, cunstituiu un de ls opontos mais alto i mais nobres deste nosso eibento.
Muito oubrigado Faustino pul tou testio i pula tue eicelente colaboraçon na divulgaçon deeibento.
Un arrochado abraço de,
Leonardo