07/11/10

La Paixarina Azul

La paixarina azul, nun ye mas ye tan berdadeira; nun sabe mas sabe l que diç; ye ne l bolar que se apega a la bida i mos diç que la bida ye para ser bibida. Ls purmeiros anhos son tan amportantes para nuossas bidas; l que se recibe molda i faç l que somos. L çtino fuge i mos agarra; ls suonhos que se mos çprenden i apuis nun los agarramos mas stan bien andrento de la fardela de nuossas lhembráncias.
Cumo mos agarran las cuontas de Bina, quaije sien mos darmos cuonta, ende stamos nós andrento deilhas, ye quaije un filme adonde mos metemos i bamos fazendo parte de la bida de las pessonas que son tan bibas i berdadeiras que stamos alhá bien pertico a fazer parte de todo l que se passa.
Las cuontas salen de l muonho de la lhana i l fuso vai çprendendo filos que se mos anrrodilhan tornando mos parte de l nobielho.

Bien haias,

António Cangueiro

3 comentários:

Ana disse...

Biba, Antonho, i depuis de Sendin l outro die...

Esse lhibro de Bina Cangueiro que yá ampecei a ler parece-me ser ua mina de cuontas i relatos mui antressantes. Todos tenemos que l ler! Dá para daprender (cousas i bidas de Prado Gaton por eisemplo que you nun sabie de maneira tan pormenorizada) cumo tamien... para rir. Nun se riu tamien, Antonho, (porque la stória ye triste i angraciada al mesmo tiempo)quando Bina mos cuonta por eisemplo la stória dessa pessona chamada Maria Oulíbia ?

Quien inda nun liu esse lhibro de Bina Cangueiro nun sabe l que perde !

"Scacição" disse...

Bina yá tengo la "paixarina azul".mas inda nun l li i agora lendo l comentário de Ana,quedei inda cun mais ganas de l ler.La cápia deste librico ye la que you mais gusto!Ye tan lebe, tan singela,quedou ouro subre azul,neste caso azul cielo sobre sépia:)

Bien haia Bina i se nun fur antes,até l lançamiento cunjunto na capital!

ACangueiro disse...

Biba Ana,

Este lhibrico de Bina Cangueiro, mostramos retratos de bidas, de tramas i dramas houmanos.

La paç i l eiquilibrio son tan amportantes...

"...porquei,...tanto sofrimento? Pregunta Ti Juçfina. Mai que sofre la mala sorte de sues filhas, mas mui digna ne ls seus uitenta anhos, ye triste...


Un LHIBRICO a reler!